काठमाडौँ । नेपाल कम्युनिस्ट पार्टीले भारतीय सरकारले भारतीय सीमा सुरक्षा बल (एसएसबी) मार्फत गरेको सीमा अतिक्रमणको विरोध गरेको छ । पार्टी प्रवक्ता प्रकाण्डले सोमबार एक विज्ञप्ति जारी गर्दै खलङ्गापारि वाङ्गाबगड र वीरेन्द्र वन इलाकामा भारतीय सीमा सुरक्षा बलले तटबन्धनको बहानामा भारतीय सिमाना भन्दा ८ देखि १० मिटर नेपाली भू–भागलाई मिचेर तटबन्ध गर्न थालेको घटनाप्रति पार्टीको गम्भीर ध्यानाकर्षण भएको जनाएका छन् ।
सो पार्टीले दुई देशको सिमानासम्बन्धी सवालको निरुपण गर्ने अन्तर्राष्ट्रिय कानूनी मान्यताहरुका खिलापमा एसएसबीले तटबन्धको नाममा नेपाली भूमि अतिक्रमण गरेको र तटबन्धबाट महाकाली नदीको जोखिमी एवं प्रवाह नेपाली भू–भागतिर मोड्ने बदनीयतपूर्ण कार्य तुरुन्त रोक्न भारत सरकारलाई चेतावनी दिएको छ ।
साथै खलङ्गापारिको महाकाली नदीमा एसएसबीमार्फत भारतीय सरकारले गरेको अतिक्रमणलाई तुरुन्त रोक्नका लागि कूटनीतिक र राजनीतिक पहल गर्न नशेरबहादुर देउवा सरकारसँग सो पार्टीले माग गरेको छ ।
