काठमाडौँ । नेपाली सेनाका पूर्व जर्नेल कुलबहादुर खड्काको निधन भएको खबर छ । उनको मंगलबार काठमाडौँमा निधन भएको हाे ।
उनी क्यान्सरका विरामी थिए । उनलाई शरीरकाे पाचनप्रणालीमा क्यान्सर भएको करिब डेढ महिना अघि मात्र पत्ता लागेको थियो । उनी नेपाली सेनाको प्रधान सेनापति नियुक्ति भएर पनि फुली लगाउन पाएका थिएनन् ।
पहिलो संविधान सभाको निर्वाचनपछि बनेको तत्कालीन माओवादीको प्रचण्ड सरकारले त्यस समयका प्रधान सेनापति रुकमांगत कटवाललाई बर्खास्त गरेर उनलाई प्रधान सेनापति नियुक्त गरेको थियो । तर तत्कालीन राष्ट्रपति डा.रामवरण यादवको आपत्तिपछि सो निर्णय कार्यान्वयन हुन नसकेपछि उनले प्रधान सेनापतिको रुपमा पदबहाली गर्न पाएका थिएनन् ।