काठमाडौं । १४ दिनदेखि सडक केन्द्रित आन्दोलन गर्दै आएका सामुदायिक विद्यालयका शिक्षकहरुसँग आज नेपाली कांग्रेसका महामन्त्रीहरु गगन थापा र विश्वप्रकाश शर्माले छलफल गरेका छन् ।
शिक्षकका माग पुरा गर्नेबारे सरकारले कुनै औपचारिक निर्णय नगरेका बेला कांग्रेसका महामन्त्रीहरु थापा र शर्माले छलफल गरेका हुन् । कांग्रेसको पार्टी कार्यालय सानेपामा भएको भेटघाटमा शिक्षकहरुले राखेका बारेका बारेमा छलफल भएको बताइएको छ ।
शिक्षकहरुले विद्यालय शिक्षा ऐन तत्काल जारी गर्नुपर्नेलगायतका पेशागत हकहितको माग गर्दै काठमाडौंमा सडक केन्द्रित आन्दोलन गर्दै आएका छन् ।
शिक्षकहरुको आन्दोलनका कारण वैशाख १ गतेबाट सुरु भएको नयाँ शैक्षिक सत्र अन्योलमा परेको छ । यसैगरी विद्यार्थी भर्ना अभियान पनि प्रभावित भएको छ । शिक्षकहरुले एसईई परीक्षाको उत्तरपुस्तिका परीक्षण गरेका छैनन् । वैशाख ११ गते सुरु हुने कक्षा १२ को परीक्षा सञ्चालनमा पनि आफूहरु सहभागी नहुने घोषणा उनीहरुले गरेका छन् ।
सरकार र आन्दोलनरत शिक्षकहरुबीच सहमतिका लागि वार्तासमेत हुन सकेको छैन ।
