काठमाडौं । नेपालमा आएर राजसंस्थाको पक्षमा प्रदर्शन गर्ने अमेरिकी नागरिक जुलियन किर्पाललाई सरकारले आज देश निकाला गर्दैछ । राजसंस्थाका पक्षमा नाराबाजी गर्ने क्रममा उनी पक्राउ परेका थिए ।
पक्राउ परेका अमेरिकी नागरिक ५८ वर्षीय जुलियनलाई यसअघि नै सरकारले देश निकाला गर्ने निर्णय गरेको थियो । गृह मन्त्रालयले जुलियनलाई नेपाल प्रवेशमा दुई वर्ष प्रतिबन्ध लगाउने गरी निष्कासन (डीपोर्ट) गर्ने निर्णय गरेको हो ।
गृह मन्त्रालय स्रोतका अनुसार नेपालको राजनीतिक गतिविधिमा संलग्न भएको भेटिएपछि किर्पालविरुद्ध प्रतिबन्धसहितिको डिपोर्ट गर्ने निर्णय गरिएको हो । विदेशी नागरिक भएर उनी राजनीतिक गतिविधिमा संलग्न भएका थिए । पक्राउ पर्दा पनि राजसंस्थाको पक्षमा नाराबाजी गरेका थिए । कुनै पनि विदेशी नागरिकले नेपालको आन्तरिक मामिलामा दखल दिन मिल्दैन ।
गत चैत १४ गते अमेरिकी नागरिक किर्पाल माइतीघरबाट पक्राउ परेका थिए । उनले राजसंस्थाको पक्षमा नाराबाजी लगाउनुको साथै पम्पलेट पनि प्रदर्शन गरेका थिए । लगत्तै उनलाई काठमाडौं प्रहरीले पक्राउ परेको थियो । प्रहरी अध्यागमनमा बुझाएपछि किर्पालविरुद्ध अनुसन्धान गरिएको थियो । पर्यटक भिसामा नेपाल बस्दै आएका उनले पछिल्लो समय राजावादीहरूसँग निरन्तर भेटघाटमा रहेको बताइएको छ ।
