काठमाडौं । राष्ट्रिय स्वतन्त्र पार्टीका कार्यवाहक सभापति डोलप्रसाद (डीपी) अर्यालले नयाँ सोच, संस्कार र शैलीको राजनीति आवश्यकता थप महसुस भएको बताउनुभएको छ ।

नयाँ वर्ष २०८२ को शुभकामना व्यक्त गर्दै रास्वपाका कार्यवाहक सभापति अर्यालले गएका वर्षहरूमा नेपाली नागरिकले राजनीतिक स्थायित्व, सुशासन र पारदर्शिताप्रति देखाएको भरोसा र आकांक्षालाई गम्भीर रूपमा लिएको बताउनुभएको छ । उहाँले पुराना राजनीतिक प्रवृत्तिहरूले नागरिकलाई थकित र निराश बनाएको यो बेला नयाँ सोच, संस्कार र शैलीको राजनीति आवश्यकता थप महसुस भएको समेत बताउनुभएको छ ।

‘नागरिकको आवाजलाई राजनीतिको केन्द्रमा राख्दै रास्वपा भ्रष्टाचारविरुद्धको कठोर अडान, सेवा प्रवाहमा पारदर्शिता र जवाफदेहिता तथा नवप्रवर्तनमूलक सोचमार्फत् राष्ट्र निर्माणमा सशक्त भूमिका खेल्न दृढ संकल्पित छ,’ शुभकामना सन्देशमा भनिएको छ, ‘राजनीतिको पुरातन सोचविरुद्ध नागरिकले रास्वपामार्फत् व्यक्त गरेको आशा र अपेक्षाप्रति नियोजित रुपमा बढाइएको घेराबन्दी र राजनीतिक स्वार्थका आधारमा रास्वपाको मूल नेतृत्वविरुद्ध साँधिएको प्रतिशोध एउटा दल र नेताप्रति गरिएको कुकर्म मात्र होइन, समग्र देशको रुपान्तरण गर्ने नयाँ सोच र प्रतिबद्धता माथिकै घातक प्रहार हो । र, यस प्रहारविरुद्ध न्यायप्रेमी नागरिकले सुरु गर्नुभएको प्रतिवादको सम्मान गर्दछौं ।’

कार्यवाहक सभापति अर्यालले राजनीति सिर्जित अराजकता, स्वेच्छाचारी शासन–सत्ता, जनसमस्या पहिचान र समाधानमा निरन्तर वेवास्ता जस्ता कारणले नागरिकमा बढेको निरासा आक्रोशमा बदलिने खतरामा रहेको समेत बताउनुभएको छ । उहाँले यसमा सचेत र गम्भीर हुनुपर्ने सरकार र पुरातन राजनीतिक नेतृत्व आत्मालोचनासहित कमजोरी स्वीकार्नभन्दा विपक्षी विचार र दललाई प्रहार गर्न उद्दत भएको आरोप लगाउनुभएको छ । ‘रास्वपा, यस प्रकारको अतिवादी हठ त्यागेर राजनीतिक समस्याको समाधान सहमति र संवादमार्फत् खोज्न तथा नागरिकका स्वभाविक चासो, चिन्ता र सरोकारलाई बेलैमा सम्बोधन गर्न अनुरोध गर्दछ,’ विज्ञप्तिमा भनिएको छ ।

अर्यालले जारी गरेको विज्ञप्तिमा ‘वर्षारम्भ, व्यक्त दृढता र प्रतिबद्धता पूरा गर्ने संकल्पको दिन पनि हो । त्यसैले, व्यवस्थाभित्र औंल्याइएका कमजोरीको सुधार, राष्ट्रिय जीवनका मुख्य समस्याको समाधानमा मार्गचित्र निर्माण र सुसंस्कृत प्रतिस्पर्धात्मक राजनीतिक संस्कारको अभिवृद्धिका लागि रास्वपाको सकारात्मक योगदान रहने अवगत गराउँदै सरकार र राजनीतिक नेतृत्वलाई यस दिशामा थप गम्भीर हुन आग्रह गर्दछौं,’ भनिएको छ ।

२०८२ साल नेपाल र नेपालीका लागि राष्ट्रिय स्वार्थको संकल्प र जनमैत्री शासनको राजनीतिक रुपान्तरण, सामाजिक न्याय र आर्थिक समृद्धितर्फको आधार वर्ष बनोस् भन्ने कामना पनि उहाँले गर्नुभएको छ ।