काठमाडौं । मुलुकभर कोरोना जोखिम बढ्नुमा आमसर्वसाधारणको हेलचेक्र्याइँलाई नै प्रमुख कारक मानिएको छ । लकडाउन अन्त्य भएसँगै देखिएको भीडभाड र सचेतनाका सामान्यभन्दा सामान्य उपाय पनि नअपनाउँदा जोखिम बढ्दो क्रममा रहेको जनस्वास्थ्यविद्हरू बताउँछन् ।
सरकारले २५ जनाभन्दा बढी भेला नहुन आग्रह गरे पनि कार्यान्वयनमा आउन सकेको छैन । दैनिक सभा, बैठकसमेत हुने गरेका छन् । होटेल, किराना पसल, सुपरमार्केट, वित्तीय संस्था, बैंकलगायतमा भीड लाग्न थालेको छ ।
यस्तै, सार्वजनिक सवारी साधनमा पनि भौतिक दूरी कायम गराउन निकै कठिनाइ देखिएको छ । सार्वजनिक सवारी साधनमा यात्रा गर्नेहरूको संख्या अभिलेख नगरिँदा कन्ट्याक्ट ट्रेसिङ गर्न अप्ठेरो हुने देखिएको छ ।
स्वास्थ्य तथा जनसंख्या मन्त्रालयले कम्तीमा पनि दुई मिटर भौतिक दुरी कायम गर्न भने पनि व्यवहारतः त्यसो हुन सकेको छैन । स्वास्थ्य अधिकारीहरू आत्मानुशासनबाट कोरोनालाई परास्त गर्न सकिने बताउँछन् ।
स्वास्थ्य मन्त्रालयले १२ वर्षभन्दा कम र ६० वर्षभन्दा माथिका ज्येष्ठ नागरिकलाई सकेसम्म बाहिर आवतजावत नगर्न भनेको छ । स्वास्थ्य मन्त्रालयका प्रवक्ता डा. जागेश्वर गौतमले अनावश्यक रूपमा बाहिर ननिस्किन आग्रह गरे । पछिल्ला दिनमा सहरी क्षेत्रमा मानिसको आवतजावत बाक्लिँदै गएको छ । बाहिर निस्किँदा र काम सकिँदा अति आवश्यक मानिएका मास्क, सेनिटाइजर, साबुनपानीको समेत उचित प्रयोग गर्न जनस्वास्थ्य विज्ञहरूले सुझाव दिँदै आएका छन् ।
यसैबीच, आइतबार २ सय ४६ जना संक्रमित थपिएका छन् । यससँगै संक्रमितको संख्या २० हजार ३ सय ३२ पुगेको छ । हाल देशभर सक्रिय संक्रमितको संख्या ५ हजार ६ सय ७२ पुगेको छ । प्रदेश १ २ सय ५१, प्रदेश २ मा २ हजार १ सय ७५, बाग्मती प्रदेशमा ६ सय ६, गण्डकी प्रदेशमा २ सय ८७, प्रदेश ५ मा ३ सय ९६, कर्णाली प्रदेशमा २ सय ९३ र सुदूरपश्चिम प्रदेशमा १ हजार ६ सय ६४ सक्रिय संक्रमित रहेको स्वास्थ्य मन्त्रालयले जनाएको छ ।
यस्तै, हालसम्म संक्रमितमध्ये १४ हजार ६ सय ३ जना डिस्चार्ज भएका छन् । जसअन्तर्गत प्रदेश १ मा ८ सय ५८, प्रदेश २ मा ३ हजार १ सय ६४, बाग्मती प्रदेशमा ५ सय ३४, गण्डकी प्रदेशमा १ हजार ३ सय ६, प्रदेश ५ मा ३ हजार ९ सय ७३, कर्णाली प्रदेशमा १ हजार ७ सय २२ र सुदूरपश्चिम प्रदेशमा ३ हजार ७६ जना डिस्चार्ज भएका छन् ।
हालसम्म ३ लाख ९१ हजार २ सय ७० जनाको आरटी–पिसिआर प्रविधिबाट कोरोना परीक्षण गरिएको छ । आइतबार मात्रै ८ हजार ८ सय ६१ जनाको कोरोना परीक्षण गरिएको स्वास्थ्य मन्त्रालयले जनाएको छ । हाल देशभर १० हजार ९ सय ३४ जना क्वारेन्टिनमा छन् । संक्रमितमध्ये ५७ जनाको मृत्यु भएको छ ।, राजधाानीबाट
