एजेन्सी । चौथो टी–२० खेलमा न्युजिल्याण्ड क्रिकेट टिमले पाकिस्तानलाई ११५ रनले पराजित गरेको छ । जितका लागि २२१ रनको लक्ष्य पाएको पाकिस्तान १०५ रनमै अलआउट भयो । यससँगै, न्युजिल्यान्डले ५ खेलको टी-२० सिरिजमा ३-१ को अग्रता लिएको छ ।
टिम सेफर्ट र फिन एलेनले न्युजिल्यान्डलाई सुखद सुरुवात गराए । सेफर्टले २२ बलमा ४ छक्का र ३ चौकाको मद्दतले ४४ रन बनाए । फिन एलेनले २० बलमा ३ छक्का र ६ चौका प्रहार गर्दै ५० रनको उत्कृष्ट इनिङ खेले ।
मध्यक्रममा मार्क च्यापम्यानले १६ बलमा २० रन र डेरिल मिचेलले २३ बलमा २९ रन बनाएर महत्वपूर्ण भूमिका खेलेका थिए । अन्त्यमा कप्तान माइकल ब्रेसवेलले २६ बलमा ४६ रनको उत्कृष्ट इनिङ खेले । यस इनिङ्समा उनले २ छक्का र ५ चौका प्रहार गरेका थिए ।
यता, पावरप्लेमा पाकिस्तानको आधा टोली प्याभिलियन फर्किएको थियो । ओपनर जोडी मोहम्मद हरिस (२) र हसन जवाज (१) रन बनाएर आउट भए । कप्तान सलमान अली आगा पनि १ रन बनाएर प्याभिलियन फर्किए । शादाब खान १ र खुशदिल शाहले ६ रन जोडे । टोलीका लागि भाइ अब्दुल समदले सर्वाधिक ३० बलमा ४४ रन बनाए ।
न्युजिल्याण्डको जितमा डफीले ४ विकेट लिए । उनले ४ ओभरको स्पेलमा २० रन मात्र दिए । जाचरी फाउल्केसले ४ ओभरमा २५ रन दिएर ३ विकेट लिए । उनका अलावा जेम्स निशम, ईश सोधी र विल ओउरकेले १–१ विकेट लिए ।
