झापा। मेचीनगर गोल्डकप काँकरभिट्टा खेल मैदानमा आजदेखि सुरु भएको छ । उद्घाटन खेलमा पाहुना टोली कालिम्पोङलाई हराउँदै आयोजक काँकरभिट्टा फुटबल ट्रेनिङ सेन्टर सेमिफाइनलमा प्रवेश गरेको छ ।
पाँचाैँ संस्करको प्रतियोगिताको पहिलो खेलमा जर्जियन फुटबल क्लब कालिम्पोङलाई आयोजक काँकरभिट्टा फुटबल ट्रेनिङ सेन्टरले ४–२ गोल अन्तरले हराउँदै फाइनल प्रवेश गरेको हो ।
कालिम्पोङले खेलको २८औँ मिनेटमा गोल गर्दै अग्रता लिएको थियो । पहिलो हाफको ४४औँ मिनेटमा आयोजकका निशान लिम्बूले ‘पेनाल्टी’मार्फत गोल गर्दै बराबरी गरे ।
खेलको दोस्रो हाफको छैटौँ मिनेटमा आयोजकका लागि विदेशी खेलाडी इब्राहिमले ‘हेड’मार्फत दोस्रो गोल गर्दै आयोजकलाई अग्रता दिलाएका हुन् । दोस्रो हाफको १६औँ मिनेटमा लिम्बूले दोस्रो गोल गर्दै टोलीलाई ३–१ को अग्रता दिलाए ।
खेलको १९औँ मिनेटमा आयोजका रोबर्टले टोलीका लागि चौथो गोल गर्दा ४–१ को अग्रता भएको थियो । दोस्रो हाफको अतिरिक्त समयमा कालिम्पोङका सत्यम शर्माले टोलीका लागि दोस्रो गोल गर्दै गोलअन्तर ४–२ ले घटाए ।
आज भएको उद्घाटन खेलको ‘म्यान अफ दी म्याच’ दुई गोल गरेका आयोजकका निशान लिम्बू घोषित भएसँगै नगद रु ११ हजार प्राप्त गरेका छन् । प्रतियोगिताको दोस्रो खेलअन्तर्गत आइतबार चर्च ब्वाइज काठमाडौँ र झापा एफसीबीच हुने आयोजका महासचिव लाक्पा तामाङले बताए ।
प्रतियोगिताको विजेताले रु १० लाख, उपविजेताले रु पाँच लाख तथा ट्रफी प्राप्त गर्नेछन् । गोल्डकपको उत्कृष्ट खेलाडीले रु ५१ हजार, सर्वाधिक गोलकतर्ताले रु २५ हजार, उत्कृष्ट गोलरक्षक र कोचले रु २१ हजारका दरले पुरस्कार प्राप्त गर्नेछन् । उनका अनुसार त्यस्तै उदीयमान खेलाडीले नगद रु १५ हजार, प्रत्येक खेलको उत्कृष्ट खेलाडीले रु ११ हजार पाउने छन् ।
गोल्डकपको संरक्षकमा मेचीनगर नगरपालिका रहेको छभने प्राविधिक सहयोग झापा जिल्ला फुटबल सङ्घ र मेचीनगर खेलकुद विकास समिति रहेको छ ।रासस
