काठमाडौं । सत्तारुढ नेपाल कम्युनिष्ट पार्टी (नेकपा) को शनिबार बस्ने भनिएको नेकपा सचिवालय बैठक फेरि स्थगित भएको छ । मंगलबार प्रधानमन्त्री तथा पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’बीच भएको छलफलमा शनिबार बस्ने सहमति भएको बैठक कोरोना संक्रमणका स्थगित भएको हो ।
नेकपाका सचिवालय सदस्यसमेत रहनुभएका उपप्रधान तथा रक्षामन्त्री ईश्वर पोखरेल र गृहमन्त्री रामबहादुर थापाको सम्पर्कमा रहेका व्यक्तिमा कोरोना पुष्टि भएको कारण भोलिका लागि तय गरिएको सचिवालय बैठक स्थगित गरिएको जानकारी नेकपाका नेताहरुले दिएका छन ।
सिसिएमसीका केही कर्मचारीमा कोरोना संक्रमण देखिएको र केही दिनअघि दुवै मन्त्री सो बैठकमा रहेको स्रोतको भनाई छ । मन्त्रीद्वय पोखरेल र थापा यही सोमवार सिसीएमसीको सचिवालयमा अनुगमनका लागि पुग्नुभएको थियो । सो क्रममा सो कार्यालयका केही सहयोगीहरुमा कोरोना संक्रमण भएपछि भोलिको बैठक स्थगित गरिएको हो । संक्रमितसँग सम्पर्कमा रहेको कारण दुवै मन्त्रीको पिसिआर परीक्षणका लागि स्वाव लिइएको छ ।
गत साउन ३० गते पार्टी एकतामा देखिएको विवादको समाधानका लागि महासचिव विष्णुप्रसाद पौडेलको संयोजकत्वमा छ सदस्यीय कार्यदल गठन गरिएको थियो । कार्यदलले यही भदौ ६ गते दुवै अध्यक्षलाई प्रतिवेदन बुझाइसकेको छ ।
