काठमाडौं: स्वयम्भू महोत्सव २०८१ मा चर्चित नेपाली साँगितिक समूह ‘कुटुम्ब’ ले आफ्नो सशक्त प्रस्तुति दिँदै दर्शकहरूलाई मुग्ध पारेको छ ।
परम्परागत बाजागाजाको आधुनिक समायोजनमार्फत नेपाली मौलिक संगीतलाई जीवन्त राख्ने कुटुम्बले महोत्सवमा लोकधुनका विविध रचनाहरू प्रस्तुत गरेको थियो ।
स्वयम्भूको ऐतिहासिक र धार्मिक परिवेशबीच मादल, सारंगी, बाँसुरी, ढोलक, तथा अन्य पारम्परिक वाद्ययन्त्रको लयले दर्शकलाई सांगीतिक यात्रामा डुबायो। समूहले ‘रेशम फिरिरी’, ‘सानु’, ‘कुटुम्ब थिम’ जस्ता लोकप्रिय धुनहरू प्रस्तुत गर्दा माहोल नै ऊर्जाशील बन्यो। कार्यक्रममा स्थानिय कलाकारहरु र कुटुम्बको टोलीले सयुक्त प्रस्तुती समेत दिएको थियो ।
महोत्सवमा धार्मिक, सांस्कृतिक तथा पर्यटन प्रवर्द्धनका विभिन्न कार्यक्रम भइरहेका छन्। कुटुम्बको प्रस्तुतिले न केवल सांगीतिक रमाइलो प्रदान गर्यो, बरु नेपाली लोकसंगीतको महत्त्व झल्काउँदै मौलिक पहिचानलाई अन्तर्राष्ट्रिय स्तरमा प्रवर्द्धन गर्ने महोत्सवको ध्येयलाई बल पुर्याएको छ।
स्वयम्भू महोत्सवमा अझै केही दिन विविध सांस्कृतिक कार्यक्रमहरू प्रस्तुत हुनेछन्, जसमा विभिन्न कलाकार तथा सांगीतिक समूहहरूको सहभागिता रहनेछ। नेशनल बाथरोग सेन्टरको सचेतनामुलक अभियान स्वस्थ जीवनका लागि सुमधुर संगित भन्ने नारा सहित कुटुम्बले प्रस्तुती दिएको थियो ।
स्वयम्भू भगवान पाउमा रहेको भुखेल चौरमा गत १० गते देखी एक साता सम्म पुर्खाको पौरख नेपालीको गौरवूको नारा सहित महोत्सब चलिरहेको छ ।
