काठमाडौँ। रुपन्देहीको एक्स्ट्राटेक ओभल क्रिकेट स्टेडियममा फ्लड लाइट जडानको काम सम्पन्न भएको छ । नेपालमा कुनैपनि क्रिकेट मैदानमा फ्लड लाइट हालिएको यो पहिलोपटक हो ।
एक्स्ट्राटेक मैदानमा करिब ७ करोड लागतमा ५ वटा फ्लड लाइट जडान गरिएको स्टेडियमका प्रबन्ध निर्देशक विनोद कुँवरले जानकारी दिए । सोमबारदेखि लाइट टेस्टिङको काम सुरु गरिने उनले बताए ।
०८० साल जेठ २९ गते शिलान्यास भएको मैदान ०८० फागुनमै तयार भएको थियो । फागुन २८ मा मैदानको उद्घाटन गरी लिजेण्ड्स कप क्रिकेट प्रतियोगिता आयोजना गरिएको थियो ।
नेट प्राक्टिसका लागि पनि छुट्टै पिच तयार गर्ने काम भइरहेको र अन्तिम चरणमा रहेको निर्देशक कुँवरले बताए । साथै, मैदानमा प्याराफिट लगायत अन्य भौतिक संरचनाका कामहरु पनि अगाडि बढिरहेको उनले बताए ।
