काठमाडौं । काठमाडौं महानगरपालिकाका मेयर विद्यासुन्दर शाक्यलाई कोरोना संक्रमण पुष्टि भएको जनाइएको छ । मेयर शाक्यले दुई दिनअघि स्वाब दिएका थिए । उनलाई सोमबार कोरोना संक्रमण पुष्टि भएको उनको सचिवालयले जानकारी दिएको हो ।
मेयर शाक्यको सचिवालयका अनुसार शाक्यकी पत्नीलाई स्वास्थ्यमा समस्या देखिएपछि उनको स्वास्थ्य परीक्षण गराइएको थियो । त्यसै क्रममा शाक्य दम्पत्तिले स्वाब दिएका थिए । शाक्यकी पत्नीलाई कोरोना संक्रमण नदेखिएको र मेयर शाक्यलाई भने देखिएको छ ।
उनको सचिवालयले दिएको जानकारीअनुसार मेयर शाक्यलाई कोरोना संक्रमणको लक्षण भने देखिएको छैन । मेयर शाक्य सोमबारदेखि होम आइसोलेसनमा बसेका बताइएको छ ।
