एजेन्सी । भारतीय क्रिकेटर युजवेन्द्र चहल र उनकी श्रीमती धनश्री वर्माको सम्बन्धविच्छेद भएको छ । कानुनी प्रक्रिया पूरा गरेपछि दुवैले औपचारिक रुपमा अलग हुने निर्णय गरेका हुन् ।
अन्तिम निर्णय लिनु अघि दुबै विगत १८ महिनादेखि अलग बस्दै आएका थिए । लामो समयदेखि सामाजिक सञ्जालमा चहल र उनकी श्रीमती धनश्रीबीच सम्बन्धविच्छेद भएको हल्ला चलिरहेको थियो ।
यद्यपी, चहल र धनश्रीको आधिकारिक बयान भने आएको छैन । युजवेन्द्र र धनश्रीको विवाह ११ डिसेम्बर २०२० मा भएको थियो ।
धनश्री वर्माले झलक दिखला जा–११ को एपिसोडमा युजवेन्द्र चहलसँगको आफ्नो प्रेमकथाको खुलासा गरेकी थिइन् । उनले लकडाउनको समयमा चहलले कसरी डान्स सिक्न आफूसँग सम्पर्क गरेको बताइन् । यसपछि धनश्री उनलाई नृत्य सिकाउन राजी भइन् । पछि दुवै एक अर्काको प्रेममा परे ।
सन् २०२३ मा युजवेन्द्रले आफ्नो सामाजिक सञ्जालमा एउटा स्टोरी सेयर गरेका थिए, जसमा लेखिएको थियो, नयाँ जीवन आउँदैछ । यसपछि अभिनेत्री धनश्रीले इन्स्टाग्राममा आफ्नो प्रयोगकर्ता नामबाट चहल उपनाम हटाएकी थिइन् । यसपछि उनीहरुको सम्बन्धविच्छेदको हल्लाले तीव्रता पाएको थियो । तर, क्रिकेटरले पछि सम्बन्धविच्छेदको खबरलाई अफवाह भनेका थिए ।
युजवेन्द्र चहल अहिले भारतीय टोलिबाट बाहिर छन् । उनी २०२४ को टी–२० विश्वकप जित्ने टोलीमा थिए तर उनले एक खेल पनि खेल्ने मौका पाएनन् । उनले भारतका लागि जनवरी २०२३ मा अन्तिम ओडीआई खेलेका थिए भने अन्तिम टी–२० अगस्ट २०२३ मा खेलेका थिए । यसपछि पनि उनलाई पञ्जाब किङ्सले आईपीएल २०२५ को लिलामीमा १८ करोडमा किनेको थियो ।
