काठमाडौं । नेपालले चालु आर्थिक वर्ष २०८१/८२ को पहिलो सात महिनामा भारत र चीनसँग सबैभन्दा ठूलो व्यापार घाटा बेहोरेको छ ।
बिहिबार भन्सार विभागले सार्वजनिक गरेको चालु आर्थिक वर्ष २०८१/८२ को पहिलो सात महिनाको तथ्यांकअनुसार नेपालको कुल व्यापार घाटा ८६१ अर्ब रुपैयाँभन्दा बढी रहेको छ ।
चालु आर्थिक वर्षको सात महिनामा नेपालले ११ खर्ब १५ अर्ब ७९ करोड रुपैयाँ बराबरको वैदेशिक व्यापार गरेकोमा ८ खर्ब ६१ अर्ब ३८ करोड रुपैयाँ बराबर व्यापार घाटा व्यहोरेको छ । गत आवको सोही अवधिमा ९ खर्ब ८४ अर्ब ७७ करोड बराबरको वैदेशिक व्यापार भएको थियो भने ८ खर्ब ११ अर्ब ११ करोड बराबरको व्यापार घाटा व्यहोरेको भन्सार विभागको तथ्यांकमा उल्लेख छ ।
चालू आवको सात महिनामा नेपालले ९ खर्ब ८८ अर्ब ५८ करोड रुपैयाँ बराबरको वस्तु आयात गरेको छ । गत आवको सोही अवधिको तुलनामा यो १०.०९ प्रतिशत बढी हो । गत आवमा सो अवधिमा ८ खर्ब ९७ अर्ब ९४ करोड रुपैयाँ बराबरको वस्तु आयात भएको थियो ।
नेपालले भारतबाट ५९६ अर्ब रुपैयाँभन्दा बढीको वस्तु आयात गरेको छ भने ९८ अर्ब रुपैयाँ बराबरको बस्तु निर्यात गरेको छ । जसअनुसार भारतसँग नेपालको व्यापार घाटा ४९८ अर्ब रुपैयाँ पुगेको छ ।
यस्तै, नेपालले चीनबाट १९२ अर्ब रुपैयाँभन्दा बढीको सामान आयात गरेको छ भने २ अर्ब रुपैयाँ बराबरको निर्यात गरेको छ । जसअनुसार चिनसँग नेपालको व्यापार घाटा १९० अर्ब रुपैयाँभन्दा माथि रहेको छ ।
नेपालको यस अवधिमा १५९ भन्दा बढी देशसँग कारोबार गरेकोमा अमेरिकाबाट १४ अर्ब ५८ करोड रुपैयाँको आयात भएको छ भने निर्यात १० अर्ब रुपैयाँ नाघेको छ । यस्तै, जर्मनीबाट ३ अर्ब ८१ करोड रुपैयाँ बराबरको सामान आयात गरेकोमा २ अर्ब ५१ करोड रुपैयाँ बराबरको निर्यात गरेको छ ।
