काठमाडौं । ललितपुर जिल्ला प्रशासन कार्यालयले शुक्रबार राति १० बजेबाट कर्फ्यू हटाएको छ । तर कर्फ्यू हटाए पनि फेरि जिल्लाका दुई क्षेत्रलाई निषेधित क्षेत्र घोषणा गरेको छ । यहाँ मच्छिन्द्रनाथको रथ तान्ने क्रममा बिहीबार झडप भएपछि त्यहाँ तनाव उत्पन्न भएको छ । रथ तान्दा बिहीबार प्रहरी र रथ तान्न आएका व्यक्तिबीच झडपपछि प्रशासनले शुक्रबार बिहानदेखि राति १० बजेसम्म कर्फ्यू लगाएको थियो। कर्फ्यू अहिले राति १० बजेबाट हटाइएको जिल्ला प्रशासन कार्यालयले जनाएको छ ।
कर्फ्यू हट्ने भएपछि जिल्ला प्रशासन कार्यालय ललितपुरले मछिन्द्रनाथको रथ रहेको ठाउँ पुल्चोक र मंगलबजारलाई निषेधित क्षेत्र घोषणा गरेको हो । रथ रहेको क्षेत्रमा पूर्व मदनस्मारकदेखि पश्चिममा महानगरपालिकाको कार्यालय, उत्तरमा बख्खुडोल र दक्षिण सेन्ट जेभियर स्कुलसम्मलाई निधेषित क्षेत्र घोषणा गरिएको छ। त्यस्तै मंगलबजारतर्फ पूर्व मंगलबजार चोक, पश्चिम मदनस्मारक अगाडिको चोक, उत्तरमा तिमबहाल र दक्षिण पूर्णचण्डी मन्दिरसम्मलाई निषेधित क्षेत्र घोषणा गरिएको हो।
ती क्षेत्रमा घोषणा गरिएको निषेधाज्ञा शनिबार बिहान ५ बजेदेखि बेलुका १० बजेसम्म लागू हुने जानकारी जिल्ला प्रशासनले दिएको छ । निषेधाज्ञा जारी गरिएका क्षेत्रमा ५ जनाभन्दा बढी मानिस जम्मा हुन नदिइने सो सूचनामा बताइएको छ ।
