बुटवल । शुल्क नतिरेको निहुँमा एक अभिभावकमाथि कुटपिट भएको छ । नवलपुरको विनयी त्रिवेणी गाउँपालिका–६, रानीनगरस्थित उज्ज्वल शिशु बोर्डिङका प्रिन्सिपल दीपक कुँवरले शुल्क नतिरेको निहुँमा एक अभिभावकमाथि कुटपिट गरेका हुन्।
नवलपरासी पश्चिम सुस्ता गाउँपालिका–३ पत्थरकलाका कृष्णप्रसाद आचार्यमाथि प्रिन्सिपल कुँवरले कुटपिट गर्दा खुट्टाको फ्युमर (साप्रा) फ्याक्चर भएको छ ।
प्रिन्सिपल कुटपिठबाट घाइते भएका आचार्यको खुट्टाको अप्रेशन र औषधिमा दुई लाख २० हजार रुपैयाँभन्दा बढी खर्च भएको छ । तर उक्त खर्च तिर्न नसक्दा अस्पतालले भदौ १९ गते नै डिस्चार्ज दिएपनि घरको आर्थिक अवस्था कमजोर रहेका कारण आचार्य बुटवलको लुम्बिनी सिटी अस्पतालमै अलपत्र छन् ।
आचार्यका छोरा भरतका अनुसार प्रहरीले यतिका दिनसम्म त प्रिन्सिपललाई पक्राउ गर्न आनाकानी गरिरहेको बताए । प्रिन्सिपल कुँवरले आठ वर्षसम्म बिर्सिएको पुरानो बक्यौता शुल्क लकडाउनका बेला तिर्न दबाब दिइरहेका थिए । कृष्णप्रसादका दुई छोरा रामप्रसाद र लक्ष्मणले २०६९ सालमा एसएलसी दिएका थिए ।
परीक्षामा दुई दाजुभाइ अनुत्तीर्ण भएकाले विद्यालयले शुल्क नमागेको होला भनेर बसेको अवस्थामा चार महिनाअघि मात्र एक्कासी शुल्क तिर्न दबाब दिएको भरतको दाबी छ । प्रिन्सिपल कुँवरले ५५ हजार बक्यौता छ भनेका तर बुबाले ३५ हजार तिर्न बाँकी रहेको र लकडाउन खुलेपछि १० हजार दिने भनेपनि नमानेर कुटपिट गरेको उनले बताए ।
जिल्ला प्रहरी कार्यालय, नवलपुरका प्रहरी नायव उपरीक्षक मोहनबहादुर खाँणले प्रिन्सिपल कुँवरविरुद्ध कुटपिट तथा अंगभंगसम्बन्धी कसुरमा मुद्दा दर्ता भएकाले अनुसन्धान भइरहेको तर पीडक फरार रहेको बताए । प्रिन्सिपल कुँवरसँग सम्पर्क गर्न खोज्दा उनको मोबाइल स्वीच्ड अफ छ ।
