मोरङ। यहाँको सुन्दरहरैँचा नगरपालिकास्थित सुकुना खेलमैदानमा जारी अन्तरराष्ट्रिय आमन्त्रण विराट भेट्रान गोल्डकप फुटबल प्रतियोगिताको आजको खेलमा आयोजकसँग उर्लाबारी भेट्रान पराजित भएको छ ।
उर्लाबारी भेट्रानलाई शून्यका विरुद्ध दुई गोलले पछि पारेसँगै आयोजक विराट भेट्रान ‘बी’ टोली प्रतियोगिताको क्वाटरफाइनलमा प्रवेश गरेको छ । कडा प्रतिस्पर्धाका बीच खेलको पहिलो हाफमा दुवै टोलीले गोल गर्न नसकेकामा दोस्रो हाफको १२ मिनेटमा आयोजक ‘बी’का खेलाडी जर्सी नं १५ का नगेन्द्र लिम्बूले पहिलो गोल गरेर आफ्नो टोलीलाई अगाडि बढाए ।
दोस्रो हाफको १६ मिनेटमा सोही टोलीका जर्सी नं २ खेलाडी महेन्द्र खवासले सानदार गोल गर्दै आफ्नो टोलीको जित सुनिश्चित गरे । जवाफी गोल फर्काउन नसक्दा उर्लाबारीको टोली प्रतियोगिताबाट बाहिरिन बाध्य भयो ।
आयोजक टोलीका ‘गोलकिपर’ सतिस बस्नेत खेलको ‘म्यान अफ दी म्याच’ घोषित भए । आगामी माघ २६ गतेसम्म सञ्चालन हुने प्रतियोगितामा नेपालका आठ र भारतका दुई गरेर १० टोलीको सहभागिता रहेको छ ।
