सुनसरी। अन्तरराष्ट्रिय आमन्त्रण बुढासुब्बा गोल्डकप फुटबल प्रतियोगिताको २५औँ संस्करणको तयारी पूरा भएको छ। आज यहाँ आयोजित पत्रकार सम्मेलनमा आयोजक धरान फुटबल क्लबका अध्यक्ष प्रताप तामाङले यही माघ १९ गतेदेखि २६ गतेसम्म सञ्चालन हुने प्रतियोगिताको तयारी पूरा भएको जानकारी दिए।
धरान उपमहानगर–१६ स्थित रङ्गशालामा आयोजना हुने प्रतियोगितामा १० वटा क्लब सहभागी रहनेछन्। माघ १९ गते पहिलो खेल लिग च्याम्पियन चर्च ब्वाइज क्लब र पुलिस क्लबबीच हुने अध्यक्ष तामाङले बताए।
प्रतियोगितामा एनआरटी क्लब काठमाडौँ, लिग च्याम्पियन चर्च ब्वाइज क्लब, नेपाल पुलिस क्लब, भुटान फुटबल एकेडेमी, त्रिभुवन आर्मी क्लब, इटहरी जागृति क्लब, युके एफसी भारत, मच्छिन्द्र क्लब काठमाडौँ, काँकडभिट्टा फुटबल ट्रेनिङ सेन्टर झापा र धरान फुटबल क्लब रहने आयोजकले जनाएको छ।
प्रतियोगिताका विजेताले ट्रफीसहित रु. १० लाख र उपविजेताले नगद रु. पाँच लाख पुरस्कार पाउनेछन्। उत्कृष्ट खेलाडीले नगद रु. एक लाख र प्रत्येक खेलको प्लेयर अफ द म्याचले रु १५ हजार, सर्वाधिक गोलकर्ताले रु. ३५ हजार, उत्कृष्ट गोलरक्षक, उत्कृष्ट डिफेन्स, उत्कृष्ट मिडफिल्डर, उत्कृष्ट स्ट्राइकर र उत्कृष्ट प्रशिक्षकले जनही रु. २५ हजार पुरस्कार पाउने क्लबका महासचिव नवीन राईले बताए।
प्रतियोगितामा विजेताले पाउने रु. दस लाख पुरस्कार धरान बहराइन एकता समाज धरान समाज युकेले प्रदान गर्ने भएको छ भने उपविजेताले पाउने रु. पाँच लाख धरान उपमहानगर–१५ निवासी हाल पोर्चुगलमा रहेका अरुण राईले प्रदान गर्ने जनाइएको छ।
प्रतियोगिताका लागि विभिन्न समिति बनाइएको अध्यक्ष तामाङले बताए। गत वर्षको संस्करण एनआरटी क्लब काठमाडौँ जितेको थियो भने जिल्ला फुटबल संघ मोरङ उपविजेता भएको थियो। रासस
