काठमाडौँ । संस्कृति, पर्यटन तथा नागरिक उड्डयनमन्त्री प्रेमबहादुर आलेले बतास समूहले सञ्चालन गर्दै आएको गौशालास्थित धर्मशालाको निरीक्षण गरेका छन् । निरीक्षणपछि उनले सेभेन स्टार होटलजस्ता धर्मशाला देखेर आफू ‘सक्ड’ (स्तब्ध) भएको बताए ।
निरीक्षणपछि मन्त्री आलेले भन्नुभयो ‘अनुगमन गरियो, कतिपय कोठाहरु प्राइभेटलाई दिइएको रहेछ । त्यो दिनै नमिल्ने कामहरु भएको रहेछ । कतिपय पशुपति क्षेत्रविकास कोष समितिसँग अनुमति लिएर गर्नुपर्ने कामहरु पनि नगरिएको देखियो । सबैभन्दा पहिलो त यो टेण्टर निकाल्ने बेला पनि पशुपति क्षेत्रविकास कोषको परिषद्को बैठकबाट यो अनुमोदन हुनुपर्दो रहेछ । त्यो समेत नभएको, थुप्रै त्यस्ता कामहरु देखिएका छन् । भोलि हाम्रो प्रतिवेदन आउँछ, त्यसपछि त्यही आधारमा हामी अघि बढ्छौँ ।’
सो सम्बन्धमा गठित छानबिन समितिले भोलि प्रतिवेदन बुझाउने जानकारी दिँदै मन्त्री आलेले प्रतिवेदनअनुसार आवश्यक निर्णय लिइने बताए । प्रतिवेदनले दोषी देखाएका सबैलाई कारवाही गर्ने उनको भनाइ थियो ।
मन्त्रालयले नारायण सुवेदीको संयोजकत्वमा छानबिन समिति गठन गरेको थियो । सो समितिले भोलि अपराह्न पशुपति क्षेत्र विकास कोषको कार्यालयमा प्रतिवेदन सार्वजनिक गर्ने कार्यक्रम छ ।
