काठमाडौं। नेपाल सरकारले मध्यपूर्वमा अक्टोबर ७, २०२३ देखि भइरहेको घटनाक्रमलाई नजिकबाट अनुगमन गरिरहेको जनाएको छ।
सरकारले गाजामा बन्धकको रिहाइ र युद्धविरामको लागि भएको पछिल्लो सम्झौताकाे स्वागत गर्दै यसलाई दीर्घकालीन शान्ति र स्थिरताको मार्गतर्फ ठोस कदम हुने आशा व्यक्त गरेको छ।
परराष्ट्र मन्त्रालयले जारी गरेको प्रेस विज्ञप्तिमा गाजाका जनताका लागि मानवीय सहायता अवरुद्ध नभई सुनिश्चित गर्न यो सम्झौताले महत्वपूर्ण भूमिका खेल्ने उल्लेख गरिएको छ।
नेपाल सरकारले आफ्ना नागरिक बिपिन जोशीसहित सबै बन्धकहरूको रिहाइको लागि निरन्तर आह्वान गरेको पनि विज्ञप्तिमा उल्लेख छ । नेपालले वार्तामा संलग्न सबै पक्षको प्रयासप्रति आभार व्यक्त गरेको छ।
