एजेन्सी । भारतीय क्रिकेट टोलीका स्टार ब्याट्सम्यान विराट कोहली २५ डिसेम्बरको बिहान मेलबर्नको एक स्थानीय रेस्टुरेन्टमा देखिएका थिए । क्रिसमसको अवसरमा उनले श्रीमती अनुष्का शर्मासँग मेलबर्नको ‘क्याफे कोर्ट’ रेष्टुरेन्टमा ब्रेकफास्ट गरेका थिए ।
ब्रेकफास्ट गरेपछि विराटले रेष्टुरेन्ट स्टाफहरुसँग फोटो खिचेका थिए । अहिले उक्त तस्विरहरु सामाजिक सञ्जालमा भाइरल भइरहेका छन् । उक्त क्याफेमा नेपाली सेफ र स्टाफहरु रहेका छन् ।
क्याफेले विराट कोहली कर्मचारीसँगको तस्बिर सामाजिक सञ्जालमा पोस्ट गरेको छ । विराटले क्याफेको किचनमा गएर सबैलाई धन्यवाद दिएको र फोटो खिचाएको पनि बताए ।
क्याफेले सामाजिक सञ्जालमा लेखेको छ, ‘आज बिहान, हामी सार्वजनिक बिदामा हाम्रो क्याफे खुला राख्ने कि नराख्ने भनेर सल्लाह गरिरहेका थियौं, हामीलाई थाहा थिएन कि राजा विराट कोहली, अनुष्का शर्मा र उनका साथीहरू हाम्रो सानो क्याफेमा आएर हाम्रो परिवारलाई सेवा गर्ने मौका दिनुहुनेछ भनेर । विराट सर यति दयालु हुनुहुन्थ्यो कि उहाँ हाम्रो भान्छामा आउनुभयो, शेफहरूलाई धन्यवाद दिनुभयो र उहाँसँग फोटो खिच्ने मौका दिनुभयो।’
भारतीय टोली अहिले मेलबर्नमा छ । भारतीय टोलीले २६ डिसेम्बरदेखि अष्ट्रेलियासँग बोर्डर-गावस्कर ट्रफीको चौथो खेल खेलिरहेको छ ।
