काठमाडौँ । साँचो प्रेम त्यो हो जुन कुनै पनि परिस्थितिमा तपाईको साथमा हुन्छ । सुख र दुःखमा पनि साथ रहन्छ । भनिन्छ, कसैलाई प्रेम भयो भने उसको जीवन बदलिन्छ । तर जीवनमा परिवर्तन हुन्छ कि हुँदैन, त्यो व्यक्तिमा भर पर्छ ।
सानातिना कुराले मानिसको सम्बन्धमा दरार र सम्बन्धविच्छेद हुने युगमा प्रेमको वास्तविक अर्थ बुझाउने श्रीमान्–श्रीमतीको कथा छ । यो प्रेमकथाको सबैभन्दा ठूलो कुरा यो हो कि यसमा स्वार्थ छैन तर समर्पण छ । यो प्रेमकथाको अहिले जताततै चर्चा भइरहेको छ ।
यो प्रेमकथा सामाजिक सञ्जाल सेन्सेसन विवेक पंगेनी र उनकी प्रेमिका सिर्जनाको हो । विवेक पंगेनीको निधन डिसेम्बर १९ मा भएको थियो । उनी क्यान्सरबाट पीडित थिए । जबसम्म उनलाई यो रोगको बारेमा थाहा भयो, धेरै ढिलो भइसकेको थियो ।
चौथो स्टेजमा पुगेपछि विवेकलाई ब्रेन ट्युमर भएको पत्ता लागेको थियो । विवेकले साहसका साथ यो घातक रोगको सामना गरे । यस कार्यमा उनलाई उनकी श्रीमती सिर्जनाले पूर्ण सहयोग गरिन् । उनी सधैं विवेकको नजिकै बस्थिन् । विवेक र सिर्जनाको प्रेमकथा पनि निकै प्रेरणादायी छ ।
विवेक र सिर्जनाको प्रेम कथा निकै विशेष छ । सिर्जनाले श्रीमान्सँग बिताएका हरेक पल इन्स्टाग्राममा सेयर गरेकी छिन् । पूरै सामाजिक सञ्जाल उनीहरूको प्रेमको प्रमाण भिडियो र फोटोहरूले भरिएको छ । सिर्जनाले एक पोस्टमा आफ्नो प्रेमकथा बताएकी छिन् । उनले आफ्नो पोस्टमा विवेकसँग नौ वर्षअघि भेटेको बताएकी छन् । विवेक स्कुलमा सिनियर थिए ।
विवेक र सिर्जनाको प्रेमकथा फिल्मी कथा जस्तै छ । ६ वर्ष एकअर्कालाई डेट गरेपछि उनीहरुले विवाह गरेको सिर्जना बताउँछिन् । गत वर्ष विवेक पीएचडी पढ्न अमेरिका गएको उनले भिडियोमा बताइन् । ‘विवेक र म धेरै खुसी थियौं र हाम्रो सपनालाई आकार दिन आतुर थियौं ।’ सिर्जना भन्छिन् ।
सन् २०२४ को सुरुदेखि विवेकलाई लगातार टाउको दुख्न थालेको थियो । केही दिनपछि उनलाई हिँड्न समेत समस्या हुन थाल्यो । डाक्टरकहाँ चेकअप गर्न गएपछि विवेकले आफूलाई केही नहुने बताए । एमआरआई गरेपछि रिपोर्टमा उनको चौथो स्टेजको ब्रेन ट्युमर भएको खुलेको थियो । केही समयपछि विवेकको दुईवटा ठूला शल्यक्रिया भयो र अब विवेकको ६ महिना मात्र बाँकी रहेको चिकित्सकले बताए ।
क्यान्सर भएको थाहा पाएपछि विवेक धेरै रोए । दुवैलाई धेरै गाह्रो भयो । एक भिडियोमा विवेकको झरेको कपाल देखेर सिर्जनाले हिम्मत दिन आफूले पनि कपाल काटेको देख्न सकिन्छ । उनको अवस्था दिनप्रतिदिन नाजुक हुँदै गयो र एक दिन उनले यो संसार छोडे । बिहे भएको ४ वर्ष मात्रै बितेको थियो सिर्जना छोडेर विवेक अस्ताए ।
विवेकको घर बर्दियाको बढैयाताल गाउँपालिका वडा ५ राजपुर मैनापोखर हो । विवेकको उपचार भइरहेको अवस्थामा गत भदौ २१ गते नेपालगन्जबाट बर्दिया जानेक्रममा उनका भाई विपिनको मोटरसाइकल दुर्घटनामा परेर मृत्यु भएको थियो । विवेकका बुबा मिनराजले केबल चार महिनाको अन्तरालमा दुवै छोरा गुमाएका छन् । डेढ वर्षअघि पत्नी शोकमा परेका मिनराजलाई एकपछि अर्को बज्रपात परेको छ ।
