काठमाडौँ । पहिलो संस्करणको नेपाल प्रिमियर लिग (एनपीएल) को उपाधि जनकपुर बोल्ट्सले जितेको छ ।
शनिबार भएको रोमाञ्चक फाइनल खेलमा सुदूरपश्चिम रोयल्सलाई ५ विकेटले हराउदै जनकपुरले एनपीएलको उपाधि उचालेको हो ।
सुदूरपश्चिमले दिएको १८५ रनको लक्ष्य पछ्याएको जनकपुर १९ ओभर २ बलमा ५ विकेट गुमाएर पूरा गर्यो । जनकपुरको लागि ओपनर लाहिरु मिलिन्थाले अर्धशतकीय ईनिङ खेले । उनले ४९ बलमा ९ चौका र चार छक्का प्रहार गर्दै ८७ रन बनाए । ११ औँ ओभरको पहिलो बलमा दिपेन्द्रले मिलान्थालाई जिवनदान दिएका थिए । दिपेन्द्रले ६५ रन बनाएर खेलिरहेका मिलान्थाका क्याच छुटाएका थिए ।
मिलान्था र ओपनर आसिफ शेखले ७३ रनको साझेदारी गरेका थिए । आसिफ १९ बलमा ३३ रन बनाएर आउट भए । हर्ष ठाकेर ३० रनमा अविजित रहदा मोहम्मद मोसिनले ९ रन र जेम्स जिशमले ४ रन बनाए ।
सुदूरपश्चिमका लागि दिपेन्द्र सिंह ऐरी, स्कट कुग्गेलेइन, ईसान पाण्डे र सेफ जैवले एक एक विकेट लिए ।
त्यसअघि कीर्तिपुरस्थित टियु क्रिकेट मैदानमा टस जितेर पहिला ब्याटिङ गरेको सुदूरपश्चिमले निर्धारीत २० ओभरमा ९ विकेट गुमाएर १८४ रन बनाएको थियो ।
सुदूरपश्चिमको लागि ओपनर सेफ जैवले अर्धशतकीय ईनिङ खेले । उनले ४३ बलमा ८ चौका र दुई छक्का प्रहार गर्दै ६९ रन बनाए । पहिलो विकेटको लागि जैव र अर्का ओपनर विनोद भण्डारीले ११७ रनको शतकीय साझेदारी गरे । भण्डारीले ३१ बलमा ४१ रन बनाए ।
यस्तै, ब्राण्डन म्याकमुलम र हरमित शिंहले समान १४ रन बनाउँदा स्कट कुग्गेलेइन १३, दिपेन्द्र सिंह ऐरी ८ तथा आरिफ शेख एक रन बनाएर आउट भए ।
जनकपुरको लागि मोहम्मद मोसिनले तीन विकेट लिए । किशोर महतोले तीन विकेट लिँदा ललित राजवंशी र जेम्स निशम एक एक विकेट लिए ।
यो सँगै जनकपुरले ट्रफिसहित ट्रफीसहित रु एक करोड १० लाख रुपैयाँ पाएको छ । उपविजेता बनेको सुदूरपश्चिमले ५१ लाख पाएको छ।
