काठमाडौं । नेपाल प्रिमियर लिग (एनपीएल) मा सहोदर दाजुभाइ आमनेसामने भएका छन् । राष्ट्रिय टिमका सदस्य समेत रहेका आरिफ शेख (दाइ) र आसिफ शेख (भाइ) एनपीएलमा फरक–फरक टिमबाट भिडेका हुन् ।
आरिफ सुदूरपश्चिम रोयल्सबाट खेलिरहेका छन् भने आसिफले जनकपुर बोल्ट्सको प्रतिनिधित्व गरेका छन् । आसिफ जनकपुर बोल्ट्सका मार्की प्लेयर पनि हुन् । एनपीएलको पहिलो संस्करणमा यी दुवै टीमले उत्कृष्ट प्रदर्शन गरिरहेका छन् ।
दुई दाजुभाई आज एनपीएलको उपाधिका लागि विपरित टोलीबाट प्रतिस्पर्धामा छन् । तर उनीहरुका बाबुआमालाई भने कस्को पक्ष लिने भन्ने तनाव छ ।
आफ्नो कोखबाट हुर्किएका दुई सन्तान खेलको मैदानमा आमनेसामने मात्र छैनन्, उपाधि होडका लागि आफ्नो सम्पूर्ण शक्तिका साथ मैदानमा उत्रिँदै गरेको अवस्थामा बाबुआमालाई सकस परेको हो ।
उनीहरूको खेल करिअरमै यो दुर्लभ घटना हुँदै छ कि दाइलाई हराए भाइले र भाइलाई हराए दाइले देशभित्रको सर्वाधिक ठूलो खेलको उपाधि पाउँदै छन् । यस्तो अवस्थामा परिवारका सदस्यले कसको पक्ष लिने ? अझ बुवाआमाले कसलाई समर्थन गर्ने ?
यो धर्मसंकट अहिले नेपाल प्रिमियर लिग (एनपीएल) को फाइनलमा मोहमद सलाम शेख र आमा प्रवीण बानुको दम्पतीलाई आइलागेको छ । किनभने, उनीहरूका छोराहरू आरिफ शेख र आसिफ शेख पहिलो एनपीएलको फाइनलमा फरक टिमबाट भिड्दै छन् ।
उत्कृष्ट प्रदर्शनका कारण यी दुवै टिम अन्य ६ वटालाई पछि पार्दै फाइनल पुगेका छन्। आरिफको टिम सुदूरपश्चिमले आसिफको जनकपुरलाई २ पटक हराइसकेको छ । जनकपुर ती दुवै हारको बदला फाइनलमा उपाधि कब्जा गरेर लिन खोज्दै छ ।
यो रोचक प्रतिस्पर्धाले शेख परिवारमा थप रोमाञ्चकता र उत्सुकता भरिदिएको छ । किनभने, बुवा आसिफलाई समर्थन गर्न पुगेका छन् भने आमा आरिफको पक्षमा उभिएकी छन् । उनीहरूले आफूले समर्थन गरेका टिम र खेलाडीको जर्सीसहितको तस्बिर नै खिचाएर सार्वजनिक गरेका छन् ।
राष्ट्रिय टिमबाट आरिफ र आसिफले धेरैपटक सँगै खेलिसकेका छन् । आरिफ नेपालको वान डे टिमका अभिन्न हिस्सा हुन् । टि २० मा भने उनको प्रदर्शन उल्लेखनीय छैन । आसिफ भने वान डे र टि २० दुवैमा नेपालका नियमित ओपनर हुन् ।
एनपीएलको अक्सनमा आरिफलाई सुदुरपश्चिमले १५ लाखमा किनेको थियो । आसिफले भने मार्की खेलाडीको रुपमा २० लाख पाएका छन् ।
