एजेन्सी । । अल्लु अर्जुन स्टारर ‘पुष्पा २’ सबैभन्दा धेरै ग्रस कमाइ गर्ने हिन्दी फिल्म बनेको छ ।
यो तेलुगू फिल्मको हिन्दी संस्करणले श्रद्धा कपुर स्टारर कमेडी–हरर ड्रामा ‘स्त्री २’ को कमाइलाई पनि उछिनेको टाइम्स अफ इण्डियाले लेखेको छ ।
फिल्मले मंगलबार छिटो ६०० करोड भारु कमाउने हिन्दी फिल्मको रेकर्ड राखेको थियो । यसअघि शाहरुख खानको ‘जवान’लाई उछिन्दै ‘स्त्री २’ धेरै कमाउने हिन्दी फिल्म बनेको थियो । ‘स्त्री २’ले ५९७.९९ करोड भारु कमाएको थियो ।
‘पुष्पा २’ ले प्रदर्शनको १४ दिनसम्म ६०७.३५ करोड भारु कमाएको छ । पहिलो साता यसले सबै संस्करणमा ७२५ करोड भारु कमाएको थियो । त्यसको ६ दिनमा फिल्मले २५७ करोड भारु अतिरिक्त कमाइ गरेको हो ।
भारतभर अहिलेसम्म यो फिल्मको ग्रस कलेक्सन ९७३.१ करोड भारु पुगेको छ । भारतभर धेरै कमाउने फिल्मको कीर्तिमान रच्न यो फिल्मलाई थप ३० करोड जरुरी हुन्छ ।
भारतमा अहिलेसम्म धेरै कमाउनेमा एसएस राजामौली निर्देशित फिल्म ‘बाहुबली २ स् द कनक्लुजन’को नाममा छ । जसले भारतीय बक्स अफिसमा एक हजार ३० करोड भारु कमाएको थियो ।
