पोखरा । प्रहरी हिरासतमा रहेका राष्ट्रिय स्वतन्त्र पार्टीका सभापति रवि लामिछानेको सुतिरहेको सिसिटिभी फोटो बाहिरिएपछि प्रहरीले तस्बिरबारे छानबिन थालेको छ ।
बुधवार रातिदेखि भाइरल भएको सो तस्बिरमा रवि सुतिरहेको देखिन्छ । उनको साइडमा टेबल र त्यसमाथि किताब पनि छन् । यो फोटो किन र कसरी सार्वजनिक गरियो भन्नेबारे छानबिन भईरहेको प्रहरीले जनाएको छ ।
उक्त फोटो केही दिनअघि सामाजिक अभियान्ता भनिने डा निकोलश भुसाल नामक फेसबुक आइडीबाट पोष्ट भएको थियो । तर उनले अहिले डिलिट गरिसकेका छन् । निकोलशले उक्त तस्बिर आफैँले खिचेको र कसैलाई दोषारोपण नगरेको भन्दै तस्बिर खिचेर सार्वजनिक गरेकोमा फेसबुकबाटै माफी मागेका छन् ।
सभापति लामिछानेको सचिवालयले भने प्रहरीले नै उक्त फोटो सार्वजनिक गरेको दाबी गरेको छ । लामिछानेको सचिवालयमा रहेका प्रमोद न्यौपानेले लेखेका छन्, ‘रवि लामिछानेको हिरासतमा सुतिरहेको यो सिसिटिभीबाट लिएको फोटो बाहिरिएको छ । सिसिटिभीको नियन्त्रण प्रहरीसँग हुन्छ । त्यसैले यो फोटो प्रहरीबाटै बाहिरिएको हो । कुन उद्देश्यमा यो फोटो बाहिर लगियो ? यसको जवाफ प्रहरीले दिनुपर्छ ।’
कास्की प्रहरीले यसबारे अनुसन्धान भइरहेको बताएको छ । कास्की प्रहरी प्रमुख एसपी अजयबाबु ओलियाले भने, ‘हामी त्यो फोटोको विषयमा अनुसन्धान गरिरहेका छौं ।’
सहकारी ठगी प्रकरणमा कार्तिक २ गते काठमाडौंबाट पक्राउ परेका रवि कास्की प्रहरीको हिरासतमा छन् ।
