काठमाडौं । परराष्ट्र सेवाका पाँच जना उपसचिवको बढुवा हुने भएको छ । उनीहरुको सहसचिव बढुवा हुने भएको हो ।
परराष्ट्र सेवाका उपसचिवहरू पुष्पराज भट्टराई, मणिरत्न शर्मा, लोकबहादुर पौडेल क्षेत्री, किरण शाक्य र दुरपदा सापकोटा सहसचिवमा बढुवाका लागि सिफारिस भएका हुन् ।
संघीय मामिला तथा सामान्य प्रशासन मन्त्रालयअन्तर्गतको बढुवा समितिको सचिवालयले परराष्ट्रका पाँच जना उपसचिवलाई सहसचिवमा बढुवाका लागि सिफारिस गरिएको जनाएको छ । परराष्ट्र सेवाको उपसचिव भट्टराई, शर्मा, क्षेत्री, शाक्य र सापकोटा जेष्ठता र कार्यसम्पादनको मूल्यांकनका आधारमा बढुवा हुन लागेका हुन् । त्यसका लागि प्रक्रिया अघि बनाइएको छ ।
भट्टराई अहिले दक्षिण कोरियाका लागि आवासीय राजदूतावास, सउलमा नियोग उपप्रमुख रहेका छन् । उनी कार्यवाहक राजदूतसमेत रहेका थिए । शर्मा परराष्ट्र मन्त्रालय तथा क्षेत्री पाकिस्तानको इस्लामावादस्थित नेपाली राजदूतावासमा कार्यरत छन् । त्यस्तै शाक्य बिमिस्टेकको सचिवालयमा कार्यरत छन् । सापकोटा दिल्लीस्थित नेपाली राजदूतावासमा काउन्सिलर पदमा कार्यरत छिन् ।
