बागलुङ . ज्योतिषी पण्डित विष्णुप्रसाद पाठकलाई बागलुङ जिल्लामा अवस्थित उमानाथ प्रतिष्ठानले सम्मान तथा पुरस्कार प्रदान गरेको छ । जिल्लाको पैयुँपाटाका समाजसेवी स्वर्गीय उमानाथ पौडेलको स्मृतिमा स्थापित सो प्रतिष्ठानको गत शनिबार आयोजित कार्यक्रममा पण्डित पाठकलगायत विभिन्न स्थानीय समाजसेवी एवं प्रतिभाहरुलाई सम्मान तथा नगद पुरस्कार प्रदान गरिएको थियो ।
जिल्लामा ज्योतिषीय विधाका साथै भजन किर्तनका माध्यमबाट कला र संस्कृतिको संरक्षण एवं सम्बर्धनमा विशिष्ट योगदान पुर्याएकोमा जिल्लाको अमलाचौरका स्थानीय ज्योतिषी पण्डित विष्णुप्रसाद पाठकलाई सो प्रतिष्ठानद्वारा स्थापित आत्मराम दुर्गादेवी संस्कृति सम्मानसहित नगद पुरस्कार प्रदान गरिएको प्रतिष्ठानले जनाएको छ ।
शनिबार आयोजित उक्त कार्यक्रमका प्रमुख अतिथि नेपाल संस्कृत विश्वविद्यालयका प्राध्यापक डा केशवराज चालिसे, विशेष अतिथि प्राध्यापक डा एकनारायण पौडेलले उहाँलाई सो पुरस्कार प्रदान गर्नुभएको थियो ।
अमलाचौर निवासी ७६ बर्षीय पाठकले १४ बर्षको उमेरदेखि नै निरन्तर रुपमा भजन किर्तनका साथै ज्योतिषीय सेवा दिँदै आउनुभएको छ । उहाँको विसं २०६४ सालमा पहिलो पटक भजन चुड्का क्यासेट एल्बममा उत्पादन भई बजारमा आएको थियो । त्यसैगरी पाँच बर्षअघि शिवजीको चरण र तीन बर्षअघि मुक्तिनाथको शरण नामक दुई भजन युट्युबमार्फत् उत्पादन भएका छन् । यीमध्ये तरेली संगितद्वारा उत्पादन भएको शिवजीको चरण भजनलाई युट्युबमार्फत् करिब ४३ लाख मानिसले हेरिसकेका छन् ।
साथै सो प्रतिष्ठानले विगतका बर्षहरुजस्तै यसबर्ष पनि जिल्लाका विभिन्न विद्यालयका जेहेन्दार विद्यार्थीहरुलाई छात्रवृत्ति प्रदान गरेको थियो । त्यसैगरी समाजमा उदाहरणीय कर्य गर्ने जिवकुमारी असल आमा र जिवकुमारी असल बुहारी, शान्ति शालिग्राम कृषि पर्यटन सम्मान, भूपति ज्येष्ठ नागरिक सम्मान आदि पनि सोही समारोहमा वितरण गरिएको थियो । सो प्रतिष्ठानका अध्यक्ष हेमराज पौडेलले यस बर्ष उक्त प्रतिष्ठानको कोषबाट रु ९० हजारको पुरस्कार र छात्रवृत्ति वितरण गरिएको जानकारी दिनुभयो ।
सोही कार्यक्रममा शब्दचित्रमा शालिग्राम नामक संस्थाको तेस्रो प्रकाशनको पनि बिमोचन गरिएको थियो । सो प्रतिष्ठानका अध्यक्ष हेमराज पौडेलको अध्यक्षतामा सम्पन्न सो कार्यक्रममा सहभागी संस्था चितवनका लुकबहादुर राना सहित डा रामबहादुर केसी, दण्डपाणी शर्मा पौडेल, कुमार पौडेल, कृष्णप्रसाद पौडेल, धनपति शर्मा लगायतले मन्तव्य राख्नुभएको थियो ।
