काठमाडौं । काठमाडौं उपत्यकाको तापक्रम २.५ डिग्री सेल्सियसमा झरेको छ । आज बिहान काठमाडौंमा यो वर्षकै बढी चिसो महशुस गरिएको छ ।
जल तथा मौसम पूर्वानुमान महाशाखाले हिजो काठमाडौंको न्यूनतम तापक्रम ३.१ डिग्री सेल्सियस मापन गरेको थियो । तर आज त्यसभन्दा घटेर २.५ डिग्री सेल्सियस कायम भएको हो ।
केही दिनदेखि निरन्तर ओरालो लागेको काठमाडौंको न्यूनतम तापक्रम अझै घट्न सक्ने मौसमविदले बताएका छन् ।
काठमाडौंबाहेक पनि देशैभरि चिसो क्रमश: बढ्दै गएको छ । जुम्लामा केही दिनदेखि न्यूनतम तापक्रम माइनस ५ भन्दा कम मापन भएको छ ।
त्यस्तै जोमसोममा न्यूनतम तापक्रम ओरालो लागेर माइनस दुई देखि माइनस ३ सम्म झरेको छ । । जिरीमा पनि न्यूनतम तापक्रम शून्यभन्दा कम हुँदै गएको छ ।
दिउँसोको अधिकतम तापक्रम पनि त्यति नघटेको तर न्यूनतम तापक्रम ओरालो लागिरहेको छ । काठमाडौंमा आज १८ देखि १९ डिग्री सेल्सियसम्म अधिकतम तापक्रम रहने महाशाखाको आकलन छ ।
