काठमाडौं । प्रधानमन्त्री केपी शर्मा ओलीले पुस तेस्रो सातासम्म भारत भ्रमणमा जाने तयारी गर्नुभएको छ । चीन भ्रमणबाट फर्किएलगत्तै प्रधानमन्त्री ओलीले अर्को छिमेकी मुलुक भारत जान लाग्नुभएको हो । प्रधानमन्त्री ओलीको भ्रमणका लागि दुवै देशका प्रतिनिधिमण्डलबीच तयारी सुरु भइसकेको छ ।
प्रधानमन्त्री ओलीको भ्रमणको चाँजोपाँचो मिलाउन युरोप भ्रमणमा रहनुभएकी परराष्ट्रमन्त्री आरजु राणा त्यहिँबाट नयाँ दिल्ली जाने तयारीमा हुनुहुन्छ । उहाँले पुस ३ गते दिल्ली पुग्ने कार्यक्रम छ । पुस ५ गते दिल्लीमा इन्डो–नेपाल इकोनोमिक कन्फरेन्स तय भएको छ । सो कन्फरेन्समा सहभागी हुने राणाले दिल्लीमै विदेशमन्त्री एस.जयशंकरलगायतसँग उच्चस्तरीय भेटघाट गर्ने कार्यक्रम रहेको स्रोतले दाबी गरेको छ ।
त्यस क्रममा परराष्ट्रमन्त्री राणाले प्रधानमन्त्री ओलीको भारत भ्रमणको विषयमा आवश्यक छलफल गर्ने बताइएको छ ।
परराष्ट्र मन्त्रालय स्रोतका अनुसार प्रधानमन्त्री ओलीले पुस तेस्रो वा अन्तिम सातामा भारत भ्रमण हुने गरी तयारी थालिएको छ ।
परराष्ट्र मन्त्रालयले नेपालस्थित भारतीय दूतावाससँग समेत समन्वय गरी आन्तरिक तयारी गरिरहेको स्रोतको भनाइ छ । ओलीको भारत भ्रमणको आन्तरिक गृहकार्य चल्दै गर्दा नेपालका लागि भारतीय राजदूत नवीन श्रीवास्तव त्यही कारण अहिले दिल्ली जानुभएको छ ।
