काठमाडौं । नेपाल राष्ट्र बैंकले चालु आर्थिक वर्षको पहिलो चार महिनाको तथ्यांकले देशको आर्थिक स्थिति सुधारोन्मुख रहेको जनाएको छ । देशको वर्तमान आर्थिक तथा वित्तीय स्थिति सार्वजनिक गर्दे राष्ट्र बैंकले वार्षिक विन्दुगत आधारमा उपभोक्ता मूल्य सूचकांकमा आधारित मुद्रास्फीति ५ दशमलव ६ प्रतिशतमा कायम रहेको तथ्यांकले देखाएको हो ।
तथ्यांक अनुसारआयात ०.२ प्रतिशतले र निर्यात ४.२ प्रतिशतले बढेको छ भने विप्रेषण आप्रवाह नेपाली रुपैयाँमा ९.१ प्रतिशतले बढेको छ । यसैगरी शोधनान्तर स्थिति रु.२०५ अर्ब ८३ करोडले बचतमा रहेको छ भने कुल विदेशी विनिमय सञ्चिति अमेरिकी डलरमा १६ अर्ब ७० करोड रहेको छ ।
तथ्यांक अनुसार नेपाल सरकारको खर्च रु.४१५ अर्ब २ करोड र राजस्व परिचालन रु.३२३ अर्ब २४ करोड रहेको छ । यसैगरी विस्तृत मुद्राप्रदाय ३.० प्रतिशतले बढेको छ । वार्षिक बिन्दुगत आधारमा यस्तो मुद्राप्रदाय १२.१ प्रतिशतले बढेको छ । यसैगरी बैंक तथा वित्तीय संस्थाको निक्षेप संकलन २.३ प्रतिशतले र निजी क्षेत्रमा प्रवाहित कर्जा २.५ प्रतिशतले बढेको छ भने वार्षिक बिन्दुगत आधारमा निक्षेपको वृद्धिदर १२.६ प्रतिशत र निजी क्षेत्रमा प्रवाहित कर्जाको वृद्धिदर ६.२ प्रतिशत रहेको छ ।
तथ्यांकअनुसार आयात र निर्यातमा क्रमश: शून्य दशमलव २ प्रतिशत र ४ दशमलव २ प्रतिशतको वृद्धि भएको छ भने विप्रेषण आप्रवाह ९ दशमलव १ प्रतिशतले वृद्धि भई विदेशी विनिमय सञ्चिति १६ अर्ब ७० करोड अमेरिकी डलर पुगेको छ ।
Current Macroeconomic and Financial Situation -Nepali (Based on Four Months data of 2081.82)
