काठमाडौँ । च्याम्पियन्स लिग फुटबलमा इंग्लिस क्लब आर्सनलले जित निकालेको छ । गएराति भएको खेलमा आर्सनलले फ्रेञ्च क्लब एसी मोनाकोलाई ३–० गोलले हराएको हो ।
घरेलु टोलिलाई जित दिलाउन बुकायो साकाले दुई तथा काई हाभेर्ट्जले एक गोल गरे । खेलको ३४ औं मिनेटमा साकाको गोलबाट आर्सनलले सुरुवाती अग्रता बनाएको थियो ।
७८ औं मिनेटमा साकाले व्यक्तिगत तथा टोलीका लागि दोस्रो गोल गर्दै अग्रता दोब्बर पारे । ८८ औं मिनेटमा हाभेट्रजले गोल गर्दै आर्सनललाई ३–० को जित दिलाए ।
आर्सनल ६ खेलबाट १३ अंकसहित तालिकाको तेस्रो स्थानमा छ भने मोनाको १० आंकका साथ १६ औं स्थानमा छ ।
यस्तै, गएराति नै भएको अर्को खेलमा स्पेनिस क्लब बार्सिलोनाले जर्मन क्लब बोरुसिया डर्टमण्डलाई उसकै घरेलु मैदानमा ३–२ गोलले हरायो ।
बार्सिलोनाको जितमा खेलको ५२ औं मिनेटमा राफिन्हाले तथा ७५ र ८५ औं मिनेटमा फेरान टोरेसले (दुई गोल) गरे ।
डर्टमण्डका सेर्होउ गिरासीले ६० (पेनाल्टी) र ७८ औं मिनेटमा गरी दुई गोल गरेपनि टोलिको हार टार्न सकेनन् ।
६ खेलबाट १५ अंक जोडेको बार्सिलोना तालिकाको दोस्रो स्थानमा छ । डर्टमण्ड १२ अंकका साथ नवौं स्थानमा छ ।
३६ टोलिबीच प्रतिस्पर्धा भइरहेको च्याम्पियन्स लिगमा अंकतालिकाको आठौं स्थानमा रहने टोलि सिधै नकआउट चरणमा पुग्नेछ भने त्यसपछि २४ औं स्थानसम्म रहने टोलिले प्लेअफ खेल्नेछ ।
