काठमाडौं । नेपाल प्रिमियर लिग (एनपीएल) को दोस्रो खेलमा चितवन राइनोजले काठमाडौं गुर्खाजलाई ५ विकेटले पराजित गरेको छ ।
काठमाडौंले दिएको ११२ रनको झिनो लक्ष्य चितवनले १७ ओभर १ बलमा ५ विकेट गुमाएर पूरा गर्यो ।
चितवनका सन्तोष कार्कीले सर्वाधिक अविजित २८ रन जोडे । ल्यूक मार्टिन बेनकेन्स्टाइले २२ रन बनाए।
बलिङमा काठमाडौंका शाहब आलमले सर्वाधिक ३ विकेट लिए ।
त्यसअघि टीयु क्रिकेट मैदानमा टस हारेर पहिला ब्याटिङको निम्तो पाएको काठमाडौंले निर्धारित २० ओभरमा ९ विकेट गुमाएर १११ रन बनाएको थियो ।
काठमाडौंका सुमित महर्जनले सर्वाधिक २९ रन बनाए। यस्तै, माइकल लेभिट २५, ड्यान डौथवेट १९ र शंकर रानाले ११ रन बनाउदा अन्य कुनै पनि खेलाडिले दोहोरो अंकमा रन बनाउन सकेनन् ।
खेलमा चितवन राइनोजका सोहेल तनविर एक्लैले ५ विकेट लिए ।तनविरले आफ्नो चार ओभरमा २१ रन खर्चेर ५ विकेट लिए । कप्तान कुशल मल्ल, रिजन ढकाल, ल्यूक मार्टिन बेनकेन्स्टाइन र अमंरसिंह रौटेलाले एकएक विकेट लिए ।
आजै हुने अर्को खेलमा जनकपुर बोल्ट्स र कर्णाली याक्स भिड्दैछन् ।
