काठमाडौं । यतिखेर मुलुकमा चिनियाँ विशाल परियोजना बिआरआइको व्यापक चर्चा छ । त्यसभित्र के छ भन्ने त सायद थाहा छैन होला तर पनि अधिकांश नेपालीले चर्चा गर्ने विषय नेपालले बिआरआइमा सही गर्छ कि गर्दैन चाहिँ भन्ने भन्ने गर्दछन् ।
सबैभन्दा बढी मिडिया त्यसपछि राजनीतिक पार्टीहरुका बैठक र अहिले त चिया पसलमै पनि यसको चर्चा भइरहेको छ । अहिले यो बिआरआइ भन्ने यति चर्चामा आयो कि सबै नेपालीले यो के हो भनेर निकै सोधखोज गरिरहेका छन् ।
प्रधानमन्त्री केपी शर्मा ओली आगामी सोमबार चीनको चार दिने भ्रमणका लागि जाँदैछन् । आगामी सोमबारबाट सुरु हुने उनको भ्रमणको तयारी यतिखेर सरकारले जोडतोडका साथ गरिरहेको छ । त्यसैले उनको भ्रमणमा हुने या नहुने भनिएको बिआरआइको चर्चा नहुने कुरै भएन ।
यतिखेर यी अक्षरहरु कोरिरहँदा पनि प्रधानमन्त्री निवास बालुवाटारमा प्रधानमन्त्री ओली र उनका साथमा सत्ता साझेदार दल नेपाली काँग्रेसका सभापति शेरबहादुर देउवा समेत छलफलमै व्यस्त छन् ।
यही भ्रमणकै तयारीका लागि परराष्ट्रमन्त्री डा आरजु राणा देउवा चीन पुगेर आज स्वदेश फर्किएकी छिन् । उनले यसै विषयमा हिजो चिनियाँ विदेशमन्त्री वाङ यीसँग द्विपक्षीय भेटवार्ता पनि गरेकि छिन् ।
मन्त्री डा देउवा आज स्वदेश फर्किएकै अवस्थामा आज त्रिभुवन अन्तर्राष्ट्रिय विमानस्थलमा एउटा संयोग जुर्न पुग्यो । नेकपा एकीकृतका वरिष्ठ नेता झलनाथ खनाल चीन जाँदै थिए भने सोही जहाजमा थिए चिनियाँ राजदूत छन् सोङ । तर यहाँ चिनियाँ राजदूतको नाम मात्र उल्लेख गरिएको हो, यो संयोगमा जोड्न खोजिएको होइन ।
तर संयोग यस्तो बन्यो कि परराष्ट्र मन्त्री डा देउवाको प्रेस मिटका लागि विमानस्थलको प्रेस कक्षमा पुगेका पत्रकारहरुसँग नेता खनाल ठोक्किन पुगे । टन्नै टेलिभिजनका क्यामेरा र रिपोर्टर देखेपछि उनले विमानस्थलका सुरक्षाकर्मीलाई सोधे– आज यहाँ को आउँदैछ कि जाँदैछ ? परराष्ट्रमन्त्री चीनबाट आउँदै हुनुहुन्छ भनेपछि ए भन्दै मुन्टो हल्लाए । तर पत्रकारले इसारा गरेपछि उनी प्रेस कक्षमा पुगे र बसे । त्यसपछि प्रश्न आइहाल्यो– बिआरआइ के हुन्छ ?
नेता खनाल यसअघि पनि बिआरआईको कार्यान्वयन सम्झौतामा जस्ताको त्यस्तै हस्ताक्षर गर्नुपर्छ भन्ने पक्षमै थिए । त्यही अभिव्यक्ति यहाँ पनि दिए । आज पनि उनले भने– हामीले बिना शर्त बिआरआइमा हस्ताक्षर गर्नुपर्छ, त्यसो नगर्नु भनेको राष्ट्रघात सरह नै हो ।
त्यसको केही मिनेटमै आइन् परराष्ट्र मन्त्री डा देउवा । सोही कक्षको उही कुर्सीमा एकाध मिनेटमै मन्त्रीको अभिव्यक्ति आयो– हामीले ऋणमा कुनै पनि आयोजना लिन सक्दैनौँ भनेर चीन सरकारलाई नै भनेका छौँ । त्यसैले हामीले बिआरआईको कार्यान्वयन सम्झौतामा जस्ताको त्यस्तै हस्ताक्षर गर्न सक्दैनौँ, अनुदानमा लिने विषयमा सहमतिमा आएका छौँ ।
