काठमाडौँ । परराष्ट्रमन्त्री डा आरजु राणा देउवा जापान नजाने भएकि छिन् । उनी यही नोभेम्बर २५ मा जापान जाने कार्यक्रम रहेकामा सो स्थगित भएको छ ।
उनले जापानमा गराएको स्वास्थ्य उपचारको फलो अपका लागि त्यहाँ जाने कार्यक्रम रहेकामा चिकित्सकको समय अहिले नमिलेपछि उनी जापान जाने कार्यक्रम स्थगित भएको हो । परराष्ट्र मन्त्रालयको स्रोतका अनुसार यस पटक चिकित्सकको समय नमिलेका कारण उनी उपचारका लागि अर्काे महिना जापान जाने कार्यक्रम तय भएको हो ।
परराष्ट्रमन्त्री डा देउवा जापानमा स्वास्थ्य जाँच गराएर त्यतैबाट नोभेम्बर २८ तारिखमा बेइजिङ पुग्ने कार्यक्रम रहेको थियो । अब जापान नजाने भएपछि उनी प्रधानमन्त्री ओलीको चीन भ्रमणको तयारीस्वरुप र आवश्यक एजेण्डाहरु तय गर्न यतैबाट नोभेम्बर २८ मा चीन जान लागेकी हुन् ।
परराष्ट्र मन्त्रालयको समाचार स्रोतका अनुसार प्रधानमन्त्रीको भ्रमणको तयारीस्वरुप चिनियाँ विदेशमन्त्री वाङ यीसँग परराष्ट्रमन्त्री डा देउवाले द्विपक्षीय वार्ता गर्ने कार्यक्रम रहेको छ । सो वार्ता नोभेम्बर २९ का लागि तय भएको छ । उनी त्यसपछि फर्किएर नेपाल आउने र पछि प्रधानमन्त्रीसँगै चीन जाने कार्यक्रम तय भएको पनि मन्त्रालय स्रोतले जनाएको छ ।
प्रधानमन्त्री केपी शर्मा ओली चीन भ्रमणका लागि यही मंसिर १७ गते (डिसेम्बर २) मा चीन जाने कार्यक्रम छ । प्रधानमन्त्री डिसेम्बर ५ अर्थात् मंसिर २० गते स्वदेश फर्कने कार्यक्रम रहेको छ ।
