काठमाडौँ । प्रधानमन्त्री केपी शर्मा ओली चीन भ्रमणका लागि यही मंसिर १७ गते (डिसेम्बर २) मा चीन जाने भएका छन् । उनको यस पटकको भ्रमण चार दिनको मात्र हुने भएको छ ।
उनी आगामी मंसिर १७ मा गएर डिसेम्बर ५ अर्थात (मंसिर २० गते) स्वदेश फर्किने कार्यक्रम तय भएको छ । प्रधानमन्त्री कार्यालय स्रोतका अनुसार उनका कार्यक्रमहरु भने सबै मंसिर १८ अर्थात् डिसेम्बर ३ का लागि तय गरिएको छ ।
मंसिर १८ गते उनले चिनियाँ राष्ट्रपति सि चिनफिङ र आफ्ना चिनियाँ समकक्षीसँग वार्ता गर्नेछन् । सोही दिन उनले अरु विशिष्ठ अधिकारीसँग भेट गर्नेछन् । त्यसैगरी भ्रमणका क्रममा हुने सबै सम्झौता लगायतका कार्यक्रमहरु पनि सोही दिन हुने कार्यक्रम रहेको बताइएको छ ।
त्यसैगरी डिसेम्बर ४ मा उनले चीनको बेइजिङस्थित नेपाली दूताबासमा आयोजित कार्यक्रमलाई सम्बोधन गर्नेछन् । साथै त्यसैदिन नेपाल र चिनियाँ उद्योगी व्यवसायीहरुको संयुक्त कार्यक्रम बिजनेस समिटलाई पनि उनले सम्बोधन गर्ने कार्यक्रम रहेको छ । बेइजिङमा गरिने सो बिजनेस समिटको तयारी नेपाल उद्योग वाणिज्य महासंघको संयोजनमा अन्य निजी क्षेत्रका संस्थाहरुले गरिरहेका छन् ।
त्यसैगरी सोही दिन नै प्रधानमन्त्री ओलीले चीनको एक विश्वविद्यालयमा प्रवचन दिने पनि कार्यक्रम रहेको प्रधानमन्त्री उच्च स्रोतले जनाएको छ ।
उनको भ्रमण दलमा परराष्ट्रमन्त्री डा आरजु राणा देउवा सहित अन्य केही मन्त्री तथा सचिवहरु रहने बताइएको छ । भ्रमण दलका सदस्यहरुको नाम भने मन्त्रिपरिषदले पारित गरिसकेको छैन । उनी डिसेम्बर ५ अर्थात् मंसिर २० गते स्वदेश फर्कने कार्यक्रम रहेको छ ।
परराष्ट्रमन्त्री नोभेम्बर २८ मा चीन पुग्ने
उता परराष्ट्रमन्त्री डा आरजु राणा देउवा भने यही नोभेम्बर २८ तारिखमा नै बेइजिङ पुग्ने कार्यक्रम रहेको छ । प्रधानमन्त्री ओलीको चीन भ्रमणको तयारीस्वरुप र आवश्यक एजेण्डाहरु तय गर्नका लागि उनी चीन जान लागेकी हुन् ।
परराष्ट्र मन्त्रालयको समाचार स्रोतका अनुसार प्रधानमन्त्रीको भ्रमणको तयारीस्वरुप चिनियाँ विदेशमन्त्री वाङ यीसँग परराष्ट्रमन्त्री डा देउवाले द्विपक्षीय वार्ता गर्ने कार्यक्रम रहेको छ । सो वार्ता नोभेम्बर ३० का लागि तय भएको छ ।
उनी त्यहीँ बसेर प्रधानमन्त्रीलाई बेइजिङमा नै स्वागत गर्ने कार्यक्रम यसअघि तय भएकामा अहिले त्यसो नगरी फर्किएर नेपाल आइ पछि प्रधानमन्त्रीसँगै जाने कार्यक्रम तय भएको बताइएको छ ।
