काठमाडौं । प्रधानमन्त्री एवं नेकपा अध्यक्ष केपी ओलीलाई भेट्न नेकपाका वरिष्ठ नेता माधव कुमार नेपाल मंगलबार साँझ बालुवाटार पुगेको पछिल्लो समाचार प्राप्त भएको छ । यता नेकपाका अर्का अध्यक्ष प्रचण्डसँग प्रधानमन्त्री केपी ओलीको सम्बन्ध बिग्रिँदै भनिएका बेला वरिष्ठ नेता माधव मंगलबार साँझ बालुवाटार पुगेका थिए । यस्तो बेलामा भएको यो भेटलाई नेकपा भित्र पनि अर्थपूर्ण रुपमा लिइएको छ । यस भेटलाई प्रधानमन्त्री ओलीले नेपालसँग सहकार्यको प्रयास गरेको अर्थका रुपमा पनि कतिपयले लिएका छन्।
प्रधानमन्त्री ओली र वरिष्ठ नेता नेपालबीच मंगलबार करिब २ घन्टा छलफल भएको बालुवाटार समाचार स्रोतले जनाएको छ। भेटमा प्रधानमन्त्री ओलीले सहकार्यका लागि प्रस्ताव गरेको तर ठोस प्रगति केही हुन नसकेको समाचार स्रोतले बताएको छ । तर उक्त भेटका लागि प्रधानमन्त्री ओलीले नै नेपाललाई बोलाएका थिए कि नेपाल आफैले समय लिएर भेट्न गएका हुन् भन्ने बारेमा भने केही बुझिएको छैन ।
नेकपाका एकजना केन्द्रीय नेताले भने 'एउटासँग सम्बन्ध बिग्रिएपछि अर्कोसँग नजिक हुने प्रधानमन्त्रीको स्वभाव नै हो, त्यसैले उहाँले नै नेपाललाई भेट्न बोलाएको हुनुपर्छ ।' उता वरिष्ठ नेता नेपालनिकट एक नेताले भने प्रधानमन्त्रीले नै माधव कमरेडसँग सहकार्यका लागि प्रस्ताव गर्नुभएको थियो ।
पछिल्लो समयमा कर्णाली प्रदेशमा देखिएको विवाद समाधान गर्ने विषयमा अध्यक्षद्धय ओली र प्रचण्डबीच सम्बन्ध बिग्रिएको बताइन्छ । यसरी अर्का अध्यक्ष प्रचण्डसँग असहमति बढेसँगै प्रधानमन्त्री ओलीले नेपालसँग भेट सुरू गरेका समाचार स्रोतहरु बताउँछन् ।
प्रधानमन्त्री ओली र प्रचण्डबीच विगतको तिक्तता कर्णाली प्रदेशको विवादले झन् सतहमा ल्याइदिएको छ । उक्त विवाद समाधानका लागि भन्दै दुई जना अध्यक्षले कर्णाली प्रदेश सरकारलाई दुई अलग अलग आदेश दिएका छन् । यसरी पार्टी एकीकरण भएपछि दुवै जना अध्यक्षले कुनै एक विषयमा लिखित रुपमै यसरी अलग अलग आदेश दिएको यो पहिलो पटक हो ।
यसलाई नेकपा भित्र नै कतिपयले अहिलेसम्मकै ठूलो विवादका रुपमा लिएका छन् । त्यसैले पनि गएको कात्तिक ३ गतेयता दुई अध्यक्षबीच भेट भएको छैन। नेकपाका एकजना नेताका अनुसार ओलीले भेटका लागि बोलाएका भए पनि प्रचण्ड अहिले बालुवाटार गएका छैनन्।
