काठमाडौं । शहरी विकास राज्यमन्त्री रामवीर मानन्धरले मध्यपहाडी लोकमार्ग अन्तरगत विभिन्न दश स्थानमा बन्न लागेको पूर्वाधारसहितको आधुनिक शहर निर्माणको कामलाई तिब्रता दिइएको बताउनुभएको छ । विश्व शहरीकरण दिवसका सन्दर्भमा आइतबार बिहान काठमाडौंको बालाजुमा सञ्चारकर्मीसँग कुरा गर्दै मन्त्री मानन्धरले जनताको समृद्धिको सपनासँग जोडिएको आधुनिक र व्यवस्थित शहरीकरणका लागि सरकारले विभिन्न स्थानिय तहमा व्यवस्थित सहरीकरणको परिकल्पना गरिएको पनि मन्त्री मानन्धरले बताउनुभयो ।
राजधानी उपत्यकालाई आधुनिक शहरीकरणसँगै संस्कृति र सभ्यताको सुन्दर सहर बनाउन मन्त्रालयले गुरुयोजना बनाएको बताउँदै मन्त्री मानन्धरले राजधानीलाई आधुनिक र व्यवस्थित बनाउन थप योजना बनाइएको बताउनुभयो । मन्त्री मानन्धरले काठमाडौं शहरको दिर्घाकालिन व्यवस्थापनका लागि विभिन्न नदी किनार भएर करिडोर निर्माणलाई तिब्रता दिने र व्यवस्थित तथा आधुनिक पार्कीङ निर्माणका लागि स्थानिय तहसँग मन्त्रालयले समन्वय थालेको जानकारी पनि दिनुभयो ।
धोबीखोला तथा टुकुचाको व्यवस्थापनका लागि पनि आवश्यक काम भइरहेको बताउँदै जनताले महसुस गर्नेगरी काम भइरहेको बताउनुभयो । काठमाडौं उपत्यकाको समस्याको रुपमा रहेको फोहर व्यवस्थापनका लागि मन्त्रालयले बन्चरेडाँडा ल्याण्डफिल्ड साईट निर्माणलाई तिब्रता दिएको बताउँदै मन्त्री मानन्धरले अबको महिना दिनभित्रमा पहिलो फेजकी निर्माण सकिने बताउनुभयो । सुन्दर शहरका लागि फोहर व्यवस्थापन पहिलो सर्त भएको बताउँदै मन्त्री मानन्धरले पचासौं वर्षका लागि योजनासहित ल्याण्डफिल्ड सञ्चालनमा आउने बताउनुभयो ।
मन्त्रालयले प्रधानमन्त्रीको समृद्धिको परिकल्पना अनुसार नै निर्माणका कामलाई तिब्रता दिएको दाबी गर्नुभयो । नेपाल सरकारले अहिले देशका विभिन्न स्थानीय तहमा ७० वटा आधुनिक शहरको परिकल्पना गरि काम अघि बढाएको छ । मन्त्री मानन्धरले उपत्यकाको जनचाप कम गर्न र व्यवस्थित बसोबासका लागि राजधानी उपत्यकासँग जोडिएका स्थानमा वैकल्पिक सहर निर्माणलाई तिब्रता दिइने बताउनुभयो ।
