काठमाडौँ । साफ महिला च्याम्पियनसिप २०२४ को फाइनल खेलको टिकट ‘सोल्डआउट’ भएको छ ।
विक्री सुरु भएको एक घण्टा नबित्दै टिकट सकिएको हो । टिकट काट्नका लागि बिहानैदेखि सर्वसाधारणहरु लामबद्ध भएका थिए । बिहान ८ बजे टिकट बिक्रि सुरु गरिने भनेपनि व्यवस्थापकीय कमजोरीका कारण ९ बजेपछि मात्र टिकट बिक्री सुरु भएको थियो ।
झण्डै तीन घण्टामै विक्री गर्न ल्याइएको टिकट सकिएपछि टिकट काट्न नपाएका सर्वसाधारण आक्रोशित बन्दै नाराबाजी गरेका छन् ।
एन्फाले साधारणतर्फ ११ हजार र भिआइपी १ हजार मात्र टिकट विक्री गर्ने बताएको थियो । साधारणतर्फ ५ सय र भिआइपी १ हजार रुपैयाँ टिकट दर तोकिएको छ ।
यसैबीच, काठमाडौं महानगरले काठमाडौंका ३ स्थानमा ठूलो स्क्रिनमा फाइनल खेलको प्रत्यक्ष प्रशारण देखाउने भएको छ ।
महानगरले नेपाली महिला टोलिलाई हौसला प्रदान गर्दै टुँडिखेल, चावहिल फुटबल ग्राउण्ड र सानो गौचरन (हाँडीगाउँ)मा प्रत्यक्ष प्रशारणको व्यवस्था मिलाएको हो ।
साफ महिला च्याम्पियनसिपको उपाधिका लागि आज साँझ साढे ६ बजे नेपाल र बंगलादेशबीच प्रतिस्पर्धा हुँदैछ ।
