अबुधाबीः इन्डियन प्रिमियर लिग क्रिकेट अन्तर्गत सोमबारको खेलमा दिल्ली क्यापिटल्सले रोयल च्यालेन्जर्स बैंगलोरलाई छ विकेटले पराजित गरेको छ ।
शिखर धवन र अजिन्क्य रहाणेको प्रभावशाली खेलका कारण दिल्लीले बैंगलोरलाई सहजै ६ विकेटले पराजित गरेको हो । तर यो जितसँगै दिल्ली क्यापिटल्स प्लेअफका लागि छनौट भयो । खूद रन रेटका कारण बैंगलोर पनि प्लेअफका लागि छनौट भएको छ ।
बैंगलोरको १४ अंक छ र यो तेस्रो स्थानमा छ । दिल्ली भने १६ अंक बनाएर दोस्रो स्थानमा उक्लिएको छ ।
टस हारेर पहिले ब्याटिङको निम्तो पाएको बैंगलोरले ७ विकेट गुमाउँदै १५२ रन बनाएको थियो । बैंगलोरका लागि देवदत्त पाडिकलले ५० रनको योगदान दिएका थिए । अन्य खेलाडीमा कप्तान विराट कोहलीले २९, एबी डि भिलियर्सले ३५, शिभम दुबेले १७ रन बनाएका थिए ।
जवाफमा १५३ रनको लक्ष पछ्याएको दिल्ली क्यापिटल्सले शुरुमै पृथ्वी श लाई गुमाए पनि शिखर धवनले ५४ र अजिन्क्य रहाणेले ६० रन बनाएर टिमलाई जितको संघारमा पु–याएका थिए । दिल्लीले १९औं ओभरमा लक्ष्य पूरा गरेको थियो ।
आजको खेल पहिलो स्थानको मुम्बई इन्डियन्स र सनराइजर्स हैदराबादबीच हुनेछ । आजको खेलमा सनराइजर्स विजयी भएमा चौथो स्थानमा उक्लने र प्लेअफका लागि छनौट हुनेछ ।
आइपिएलमा लिगका चार शीर्ष टिम प्लेअफका लागि छनौट हुने व्यवस्था छ ।
