काठमाडौँ । नेदरल्यान्ड्सका क्रिकेटर बास डी लिडेले पोखरा एभेन्जर्सबाट नेपाल प्रिमियर लिग (एनपीएल) खेल्ने भएका छन् ।
पोखराले दोस्रो विदेशी खेलाडीका रुपमा लिडेलाई भित्र्याएको हो । यसअघि उसले अमेरिकाका आन्द्रेस गौसलाई टोलीमा अनुबन्ध गरेको थियो ।
नेपाल राष्ट्रिय टोलीका ब्याट्सम्यान कुशल भुर्तेल मार्की रहेको पोखरामा अनुबन्ध भएका २४ वर्षीय लिडेले नेदरल्यान्ड्सका लागि ३८ टी–२० आई खेल्दा ६९७ रन बनाएका छन् । यस्तै, बलिङतर्फ २८ खेलमा ३३ विकेट लिएका छन् ।
एनपीएलकै सबैभन्दा महँगो टिम पोखराले कुशल, लिडे र गौससँगै सागर ढकाल, आकाश चन्द, किरण कुमार ठगुन्ना, नारायण जोशी, विपिन खत्री, दिलिप नाथ, तृत राज दास, सुनम गौतम, दिनेश खरेल र अमृत गुरुङलाई अक्सनबाट छनोट गरेको छ ।
एनपीएल आगामी मंसिर १५ देखि पुस ६ सम्म आयोजना हुँदैछ ।
