काठमाडौं । नेकपा (एमाले) का स्थायी कमिटी सदस्य डा. बिन्दा पाण्डेले व्यापारीले दान दिएको भनिएको जग्गामा पार्टीको मुख्यालय बनाउनु गलत भएको टिप्पणी गर्नुभएको छ ।
कीर्तिपुर नगरपालिका -२, मैत्रीनगरमा भाटभटेनीका सञ्चालक व्यवसायी मीनबहादुर गुरुङ र सावित्री गुरुङले एमालेको मुख्यालय बनाउन भन्दै १० रोपनी १४ आना जग्गा दान गर्नुभएको छ ।
गत असोज २५ एमाले अध्यक्ष केपी शर्मा ओली र दाता गुरुङले भवन निर्माणको लागि शिलान्यास गर्नुभएको थियो ।
सो कदमको चर्को बिमती जनाउदै नेतृ पाण्डेले यो निर्णय साढे पाँच लाख पार्टी सदस्यको स्वाभिमानी शिर झुकाउने र २८ लाख मतदाताको अपमान गर्ने कदम भएको टिप्पणी गर्नुभयो ।
उहाँले सामाजिक संञ्जालमा लेख्न्नु भएको छ –
साढे पाँच लाख पार्टी सदस्यको स्वाभिमानी शिर झुकाउने र २८ लाख मतदाताको अपमान गर्ने कदम हो यो । व्यापार व्यवसाय गर्नेले पारदर्शी रुपमा कम्पनीको सामाजिक दायित्व अन्तर्गत सामाजिक काममा सहयोग गर्नु कर्तव्य नै हो ।तर, राजनीतिक दलले कार्यालय बनाउन यस्तो सहयोग लिनु र व्यापारीले दिनु दुवै ग़लत हो । दिनेले किन र कसरी दिए उनैलाई थाहा होला ।
तर, स्विकार गर्नेले पार्टीको निर्णायक तहमा छलफल र निर्णय त परको कुरा जानकारी समेत नहुने गरी गरिएको यो निर्णय दिर्घकालमा आत्मघाती सावित हुनेछ ।
समय घर्की सकेको छैन । मनमोहन र मदनहरुले उचो बनाएको पार्टीको इतिहास, वर्तमानमा वाचेका स्वाभिमानी पार्टी पंक्ति र भावी सन्ततीका लागि एमालेको गौरव जोगाउने हो भने यो ग़लत निर्णय सच्याउनै पर्छ । समयमै सोचौ ।
