काठमाडौं । तीन दिनको वर्षाका कारण त्रिभुवन अन्तर्राष्ट्रिय विमानस्थलमा उडान भर्दै आएका धेरै राष्ट्रिय र अन्तर्राष्ट्रिय वायुसेवा कम्पनीले उडान रद्द गरे ।तर, चीनको ग्वाङ्झौबाट काठमाडौंमा नियमित उडान गर्दै आइरहेको चाइना साउदर्नले भने उडान सुचारु नै गर्यो । जसका कारण यात्रुलाई सहज भएको चाइना साउदर्नले जनाएको छ ।
कम्पनीले एक बिज्ञप्ति जारी गर्दे जस्तोसुकै अवस्थामा पनि यात्रुको सुरक्षा र यात्रालाई पहिलो महत्व दिएको जनाएको छ। बिज्ञप्तिमा भनिएको छ ‘शुक्रबार राति नियमित उडानको क्रममा विमान खराब मौसमका कारण काठमाडौंमा तोकिएको समयमा अवतरण गर्न सकेन । अधिकांश विमान कम्पनीले उडान रद्ध गर्ने निर्णय गरेको अवस्थामा हामीले भने उडान भरेका थियौं’, कम्पनी भन्छ, ‘हाम्रो विमानलाई काठमाडौं नजिकैको आकाशबाट ढाका डाइभर्ट गर्ने निर्णय गरियो । तर मौसममा सुधार भएसङ्गै राति दुई घण्टापछि काठमाडौंमा सुरक्षित अवतरण भयो । नेपालका यात्रुलाई दुई घण्टा ढिलो भए पनि उडान भरेर गन्तव्यमा ल्यायौँ।’
कम्पनीले शनिबारको उडानमा ३० जना यात्रु ग्वाङ्झौ हुँदै अष्ट्रेलियाको सिड्नी जाँदै थिए । यताबाट भएको ढिलो उडानका कारण उनीहरूको सिड्नी उडान छुट्ने सम्भावना थियो । तर, विमान कम्पनी, चालक दलका सदस्य र कर्मचारीको समन्वयमा ढिलो उडानमा पनि ती यात्रुले सिड्नी कनेक्टिङमा समस्या झेल्न नपरेको जनाएको छ ।
‘चिनियाँ राष्ट्रिय दिवस,सार्वजनिक बिदालगायत कारण ग्वाङ्झौबाट सिड्नीका लागि अन्य उडानका कुनै सिट खाली थिएन । त्यसैले काठमाडौं वा ग्वाङ्झौमा अलपत्र नपार्ने उद्देश्यले तत्काल समस्या समाधानको उपाय निकालियो। उहाँहरू तोकिएको उडानमा सिड्नी प्रस्थान गर्न सफल हुनुभयो’, कम्पनीले भनेको छ ।
काठमाडौंमा गएराति पनि चाइना साउदर्नको अवतरण र उडान भयो । कम्पनीले ३० जना नेपाली यात्रुले दुई घण्टा ढिलो उडान हुँदा पनि समस्या महसुस गर्न नपरेको जनाएको छ ।
चाइना साउदर्न चीनको सबैभन्दा ठूलो वायुसेवा कम्पनी हो । यसले वार्षिक १४ करोडभन्दा बढी यात्रु ओसार्दै आएको छ । पछिल्लो समय ग्वाङझौ–काठमाडौं दैनिक दुई उडान भइरहेको छ ।
