काठमाडौँ । नेपाल र संयुक्त राज्य अमेरिकाबिच गठित व्यापार तथा लगानी ढाँचा सम्झौता परिषद् (टिफा)को सातौँ बैठक सम्पन्न भएको छ ।
काठमाडौँमा सम्पन्न बैठकमा अमेरिकाको दक्षिण र मध्य एशियाका लागि सहायक अमेरिकी व्यापार प्रतिनिधि ब्रेंडन लिंचको नेतृत्वमा रहेको अमेरिकी प्रतिनिधिमण्डल र नेपालका प्रतिनिधिहरूले दुवै देशका वस्तु र सेवाहरूमा द्विपक्षीय व्यापार र लगानी विस्तारबारे छलफल गर्नुभएको नेपालस्थित अमेरिकी राजदूतावासले जनाएको छ ।
‘आज, नेपाल सरकारले संयुक्त राज्य अमेरिका र नेपालको बीचको व्यापार तथा लगानीसम्बन्धी सम्झौता परिषद्को (टिफा) सम्बन्धी सातौं परिषद् बैठक आयोजना गर्यो । अमेरिकाको दक्षिण र मध्य एशियाका लागि सहायक अमेरिकी व्यापार प्रतिनिधि ब्रेंडन लिंचको नेतृत्वमा रहेको अमेरिकी प्रतिनिधिमण्डल र नेपालका प्रतिनिधिहरूले दुवै देशका वस्तु र सेवाहरूमा द्विपक्षीय व्यापार र लगानी विस्तारबारे छलफल गर्नुभयो ।’ दूतावासले एक वक्तव्य जारी गर्दै भनेको छ ।
टिफा छलफलको शुरुवात अप्रिल १५, २०११ मा भएको थियो । २०१५ मा नेपालमा भएको विनाशकारी भूकम्पपछि, व्यापार सुविधा र व्यापार प्रवर्तन ऐन २०१५ ले नेपालका लागि ७७ हार्मोनाइज्ड ट्यारिफ शेड्यूलमा समावेश गरिएका उत्पादनहरू (जस्तै हस्तकला, शल, र यात्रा सामग्रीहरू) लाई ड्युटी–फ्री पहुँच प्रदान गर्ने नयाँ देश–विशेष प्राथमिकता कार्यक्रम स्थापना गरिएको थियो ।
नेपाल र संयुक्त राज्य अमेरिका आपसी व्यापार वृद्धि र नेपालको अर्थतन्त्रलाई सशक्त बनाउन निरन्तर सहकार्य गर्दै आएको जनाउँदै नेपालको आर्थिक वृद्धिको समर्थन गर्दै आपसी समृद्धि आफ्नो प्रमुख प्राथमिकतामा पर्ने पनि दूतावासको भनाई छ ।
