काठमाडौंः नेपाल राष्ट्र बैंकले बोलकबोल विधिबाट ५० अर्ब रुपैयाँ निक्षेप संकलन गर्ने भएको छ । यो निक्षेप संकलन २८ दिनका लागि हुने पनि राष्ट्र ऋण व्यवस्थापन विभागले जारी गरेको सूचनामा उल्लेख छ ।
निक्षेपको सावाँ तथा ब्याज भुक्तानी आगामी पुस १५ गते हुने जनाउँदै बैंकले घटीमा रु ५ करोड र बढीमा ५ करोड रुपैयाँले भाग गर्दा निःशेष भाग जाने गरी कूल आह्वान रकमसम्म गर्न सकिने पनि बैंकले जनाएको छ ।
यो निक्षेप संकलनको बोलकबोलमा नेपाल राष्ट्र बैंकबाट इजाजतपत्र प्राप्त “क”, “ख” र “ग” बर्गका बैंक तथा वित्तीय संस्था मात्र सहभागी हुन पाउने छन् । निक्षेप संकलनको बोलकबोलमा निक्षेप वापत जम्मा गर्न चाहेको रकम र ब्याजदर (दशमलव पछिको हकमा चार अंकसम्म) उल्लेख गर्नु पर्ने बैंकले जनाएको छ ।
निक्षेप संकलनको लागि आव्हान गरिएको रकम बाँडफाँड गर्दा बोल बमोजिम सबैभन्दा कम ब्याजदरलाई पहिलो प्राथमिकता क्रममा राखी आव्हान गरेको रकमसम्म क्रमशः बाँडफाँड गरिने छ ।
