काठमाडौं । ईन्टरनेट सेवा प्रदायक कम्पनी वर्ल्डलिंकले नियमित शुल्क बुझाएका ग्राहकलाई पनि भरपर्दो सेवा नदिएको भन्दै उपभोक्ताले गुनासो गरेका छन् ।
कतिपय ग्राहकलाई प्रबिधि अपग्रेड गर्ने भन्दै पुरानो राउटर परिवर्तन गर्न लगाएको तर फेरिएको राउटरबाट ईन्टरनेट राम्ररी नचलेपछि पुन नयाँ खरिद गर्न बाध्य पारिएको गुनासो गरेका छन् ।
ललितपुरको भैसेपाटीका ग्राहक सञ्जय शर्माले भन्नुभयो, छिटो भनेकै वर्ल्डलिंकको नाराले उसैलाई गिज्याइरहेको होला । पटक पटक गुनासो गर्दा पनि सुनुवाई हुँदैन । एउटा ग्राहकलाई पटक पटक राउटर किन्न बाध्य पार्नु र परिवर्तन गर्दा पनि गुणस्तरीय सेवा प्राप्त भएको छैन ।
उहाँले भैंसेपाटी क्षेत्रका धेरै ग्राहकले यस्तै गुनासो गर्न थालेको बताउनुभयो । यसै क्षेत्रका प्रेम ओझाले पनि कम्पनीले भरपर्दो सेवा नदिएपछि दिक्क भएर अर्को इन्टरनेट प्रदायकबाट सेवा लिन बाध्य भएको गुनासो गर्नुभयो ।
उहाँहरुले कम्पनीमा सम्पर्क गर्दा राम्रोसँग रेस्पोन्स नगर्ने, सानोतिनो मर्मत गर्दा हुनेमा पनि सामान नै फेर्न लगाउने र त्यस्ता सामान उनीहरुकै कम्पनीबाट खरिद गर्नुपर्दा आफूहरु ठगिएको महसुस गर्नु भएको छ ।
पछिल्लो समय ललितपुरको जाउलाखेलमा केन्द्रीय कार्यालय रहेको वर्ल्डलिंकले राजस्व छलीगरेको आरोप पनि लागेको छ ।
नेपाल दूरसञ्चार प्राधिकरण स्रोतका अनुसार नौ वटा इन्टरनेट सेवा प्रदायकबाट रोयल्टी राजस्व तथा ग्रामीण दूरसञ्चार विकास शुल्क वापत कूल रु तीन अर्ब ६४ करोड रकम असुल गर्न बाँकी छ । जसअनुसार वर्ल्डलिंक कम्युनिकेसनले रु एक अर्ब ९६ करोडभन्दा बढी तिर्न बाँकी छ ।
