काठमाडौं । सहकारी ठगी प्रकरणमा फरार रहेका गितेन्द्रबाबु राई (जीबी) राईमाथि अनुसन्धान गर्न नेपाल प्रहरीको टोली मलेसिया पठाउने तयारी गरिएको छ ।
मलेसियामा रहेका राईलाई नेपाल फिर्ता ल्याउन नसकिएपछि नेपाल प्रहरीको टोली नै मलेसिया पठाउन लागिएको हो ।
यसको लागि नेपाल प्रहरीले दुई सदस्य प्रहरीको अनुसन्धान टोलीलाई मलेसिया पठाउन सहजीकरण गरिदिन गृह मन्त्रालयलाई पत्रचार गरेको छ ।
प्रहरी प्रधान कार्यालयले अनुसन्धान टोलीलाई मलेसिया पठाउन तीन महिनाअघि नै पहल गरेको थियो । तर, सरकार परिवर्तनले यो प्रकृया बीचमै रोकिएको नेपाल प्रहरीका महानिरीक्षक वसन्त कुँवरले जानकारी दिए । ‘हामीले तीन महिनाअघि पत्राचार गरेका थियौँ । त्यो अहिले अगाडि बढेको हो’, उनले भने ।
राईविरुद्ध यसअघि नै इन्टर पोलबाट रेड नोटिस जारी भएपनि नेपाल सरकारले उनलाई फिर्ता ल्याउन सकेको छैन । उनी मलेसियामा व्यवस्थितरूपमा बसिरहेको नेपाल प्रहरीको निष्कर्ष छ ।
राई सुर्यदर्शन सहकारीको संस्थापक अध्यक्ष हुन् । उक्त सहकारीले बचतकर्ताको १ अर्ब ११ करोड ३४ लाख ४३ हजार रुपैयाँ हिनामिना गरेको भन्दै सहकारीका पदाधिकारी विरुद्ध प्रहरीमा जाहेरी परेको थियो ।
सहकारी ठगिबारे छानबिन गर्न सूर्य थापाको संयोजकत्वमा बनेको संसदीय छानबिन समितिले पनि जीबीसहित १८ जनालाई नेपाल ल्याउनुपर्ने भन्दै गृहलाई पत्राचार गरेको थियो ।
