एजेन्सी । बलिउड अभिनेत्री कंगना रनावतले राजनीतिमा प्रवेश गर्दै लोकसभा चुनाव जितेमा चलचित्र क्षेत्र छोड्ने घोषणा गरेकी थिइन् ।
अभिनेत्री हिमाचल प्रदेशको मण्डीबाट लोकसभा चुनाव जितेर सांसद बनेकी छिन् । अभिनेत्रीका अनुसार अहिले उनी फिल्ममा काम गर्न चाहन्छिन् तर राजनीतिक करियरका कारण फिल्मी करियरलाई सन्तुलनमा राख्न समस्या भइरहेको छ ।
हालै कंगनाले भेराइटीलाई दिएको अन्तर्वार्तामा आफ्ना धेरै फिल्मको सुटिङ बाँकी रहेको बताइन् । छायांकनका लागि समय नपाउँदा उनका धेरै प्रोजेक्टहरु अलपत्र परेका छन् ।
आगामी प्रोजेक्टको बारेमा कुरा गर्दै अभिनेत्रीले भनिन्, ‘मेरो फिल्मको काम बिग्रँदै गएको छ । मेरा आगामी प्रोजेक्टहरू पर्खिरहेका छन् । मेरो फिल्मको छायांकन सुरु गर्न सकिरहेको छैन । म अहिले संसदको हिउँदे अधिवेशनको प्रतिक्षामा छु । म मेरो मिति समायोजन गर्न सक्छु ।’
कंगना रनौतको पोलिटिकल ड्रामा फिल्म इमर्जेन्सी १४ जुनमा रिलिज हुने तय भएको थियो । तर, कंगनाको राजनीतिमा व्यस्तताका कारण यो फिल्मको रिलिज मिति सारिएको थियो । अब फिल्म ६ सेप्टेम्बरमा रिलिज हुँदैछ । फिल्ममा कंगना रनावतले पूर्व प्रधानमन्त्री इन्दिरा गान्धीको भूमिका निभाएकी छिन् । कंगनाले फिल्म ‘इमर्जेन्सी’लाई निर्देशन र निर्माण गरेकी हुन् ।
