एजेन्सी । ‘धाकड, ड्याडी, क्र्याक’ जस्ता फिल्ममा देखिएका बलिउड अभिनेता अर्जुन रामपालले हालै सामाजिक सञ्जालमार्फत आफ्नो एक्स अकाउन्ट (पहिलेको ट्विटर) ह्याक भएको बताएका छन् । अर्जुनले यसलाई नराम्रो खबर भनेका छन् ।
आफ्नो आधिकारिक इन्स्टाग्राम अकाउन्टमा यो जानकारी दिँदै अर्जुन रामपालले लेखेका छन्, ‘यो राम्रो समाचार होइन । मेरो एक्स अकाउन्ट ह्याक भएको छ । कृपया, कुनै पनि ट्वीट वा सन्देशको जवाफ नदिनुहोस् ।’
अर्जुन रामपाल सोशल मिडियामा धेरै सक्रिय छन् । अभिनेता सामाजिक सञ्जालमा ओलम्पिक खेल्न जाने भारतीय खेलाडीलाई निरन्तर प्रोत्साहन दिइरहेका थिए । उनको एक्स अकाउन्टबाट उनको अन्तिम पोस्ट अगस्त ९ मा थियो, जसमा उनले एथलीट नीरज चोपडालाई भाला थ्रोमा रजत जितेकोमा बधाई दिए ।
अर्जुन रामपाल लामो समयदेखि कुनै ठूलो हिट फिल्मको हिस्सा बनेका छैनन् । सन् २०२३ मा कंगना रनावतको फिल्म ‘धाकड’मा अर्जुन खलनायकको भूमिकामा देखिएका थिए । यो फिल्म बक्स अफिसमा नराम्रोसँग फ्लप भयो । त्यसपछि यो वर्ष रिलिज भएको फिल्म ‘क्र्याक’मा विद्युत जामवालसँग देखिएका थिए । यो फिल्मले पनि बक्स अफिसमा खास केही गर्न सकेन ।
अर्जुन रामपाल चाँडै फिल्म ‘द ब्याटल अफ भीमा कोरेगाउँ’मा देखिनेछन् । फिल्मको रिलिज मिति भने घोषणा नभएपनि यो फिल्म तयार भइसकेको छ । यसबाहेक उनीसँग मंकी, नास्तिक र धुरन्दर जस्ता फिल्म पनि छन् । फिल्मका अलावा अर्जुन नेटफ्लिक्स सिरिज ‘राणा नायडू’मा पनि देखिनेछन् ।
फिल्मी करियरको कुरा गर्ने हो भने मोडलिङमा सफलता हासिल गरेपछि अर्जुन रामपालले सन् २००१ मा आएको फिल्म ‘प्यार इश्क और मोहब्बत’बाट आफ्नो अभिनय करियर सुरु गरेका थिए । अभिनेता दिल है तुम्हारा, दिल का रिश्ता, याकन, हमको तुमसे प्यार है, रक अन, हाउसफुल, राजनीती जस्ता उत्कृष्ट फिल्महरूमा देखिएका छन् ।
