एजेन्सी । सैयद रेफात अहमद बंगलादेशको नयाँ प्रधानन्यायाधीश बन्ने भएका छन् । यसबारे अगस्ट १०, शनिबार राति ९ बजे घोषणा गरिएको हो ।
यसअघि दिउँसो प्रधानन्यायाधीश ओबेदुल हसनले राजीनामा दिएका थिए । उनको राजीनामा माग गर्दै आन्दोलनरत विद्यार्थीले शनिबार बिहान सर्वोच्च अदालत घेराउ गरेका थिए ।
त्यहाँ आन्दोलनकारीहरु ठूलो संख्यामा भेला भएका थिए । विद्यार्थीहरूले भने, ‘न्यायाधीशहरूले राजीनामा नगरे हसिनाजस्तै उनीहरूलाई कुर्सीबाट बाहिर निकालिनेछ ।’ आन्दोलनरत विद्यार्थीहरूले सर्वोच्च अदालतका न्यायाधीश हसिनासँग मिलेमतोमा रहेको आरोप लगाएका थिए ।
पूर्वप्रधानमन्त्री शेख हसिना गत अगस्ट ५ मा पदबाट राजीनामा दिएर देश छाडेर भारत गएकी थिइन् ।
यी न्यायाधीशहरूले अन्तरिम सरकारलाई न सोधी शनिबार सम्पूर्ण अदालतको बैठक बोलाए । सो बैठकका कारण आन्दोलनकारीले एक घण्टाभित्र न्यायाधीशको राजीनामा माग गरेका हुन् ।
यसैबीच, बंगलादेशमा अस्थिरताको बीचमा एटीएमहरूमा नगदको अभाव छ । लुट्ने डरले धेरै बैंकले एटीएम बन्द गरेका छन् । जुलाई ५ मा प्रहरीमाथि हमला भएपछि प्रहरी काममा फर्किएका छैनन् । यस्तो अवस्थामा सुरक्षा व्यवस्था नै धरापमा परेको छ ।
